«Երդում տվածներ»՝ այսպես են Վրաստանի Պանկիսի կիրճում անվանում մարդկանց, ովքեր հավատարմության երդում են տվել ԴԱԻՇ-ին և նրա առաջնորդ Աբու Բաքր Ալ-Բաղդադիին։ Թե ինչպիսիք են ԴԱԻՇ-ի ծրագրերը կովկասյան տարածաշրջանում, և թե ինչու են երիտասարդները ավելի ու ավելի հաճախ ուղևորվում Մերձավոր Արևելք՝ այդ և այլ թեմաների մասին EADaily-ի թղթակիցը զրուցել է ծագումով Պանկիսի կիրճից՝ ԴԱԻՇ-ի անդամ Աբդուլայի հետ, ով մի քանի ամիս առաջ է վերադարձել Սիրիայից Վրաստան։
Լրագրողի հարցին՝ ինչո՞ւ են որոշել հավատարմության երդում տալ ԴԱԻՇ-ին, Աբդուլան պատասխանել է. «Բայաթի (արաբերեն՝ երդում) մեր որոշումն առաջին հերթին պայմանավորված է խալիֆայության ստեղծման Ղուրանի մարգարեությամբ։ Դա մեզ պարտավորեցնում է իսլամը։ Մենք հավատարմության երդում ենք տվել ԴԱԻՇ-ին, որպեսզի պայքարենք մուսուլմանների կյանքի, նրանց բարեկեցության և ԴԱԻՇ-ի ամրապնդման համար»։
Իսկ հարցին էլ՝ ո՞րն է իր հայրենիքը՝ Վրաստա՞նը, թե՞ «խալիֆայությունը», զրուցակիցը նշել է, որ խալիֆայությունն է իր հայրենիքը, սակայն իրենք ապրում են Վրաստանում։ «Դա մեր երկիրն է։ Եթե Վրաստանը դեմ չգնա մեզ, մենք էլ դեմ հանդես չենք գա։ Սակայն եթե մեզ հալածեն, մենք պարտավոր ենք պաշտպանել մեզ, և դրանում մեզ կպաշտպանեն շատ մուսուլմաններ։ Այժմ նրանք օգնության են գնում Սիրիա, սակայն եթե պետք լինի, կգան նաև այստեղ»։ Նա հայտնել է, որ իրենց կարծիքով՝ ԴԱԻՇ-ը պատրաստվում է բանակցություններ սկսել Վրաստանի հետ՝ երդում տվածների անձեռնմխելիության մասին։
Լրագրողը խնդրել է պարզաբանել, թե ինչ է նշանակում ԴԱԻՇ-ի կողմից Վրաստանի տարածքում «Գյուրջիստանի վիլայաթ» հայտարարելը։ Զրուցակիցը նշել է՝ դա նշանակում է, որ Վրաստանը դարձել է խալիֆայության մաս։ «Դա չի նշանակում, որ մենք մարդկանց ահաբեկչության կոչ կանենք։ Մեր պարտականությունն է Վրաստանում իսլամ քարոզելը»։
Նա նշել է, որ Սիրիա ուղևորվել և ԴԱԻՇ-ին միանալ ցանկացողներին չի կարող կանգնեցնել ոչ մի ուժ, ոչ մի օրենք։
Անդրադառնալով կովկասյան տարածաշրջանում ծրագրերին՝ Աբդուլան նշել է, որ այդ ծրագրերի մեջ է մտնում Ինգուշեթիայի, Չեչնիայի, Դաղստանի և տարածաշրջանի այլ մուսուլմանական երկրների ազատագրումը։ «Ինչ վերաբերում է տարածաշրջանի այլ երկրներին, ինչպիսին է, օրինակ, Հայաստանը, ժամանակի ընթացքում իսլամը կտարածվի նաև այնտեղ»,- ասել է զրուցակիցը։