Հոլիվուդյան հայտնի դերասան Բրեդ Փիթը և ամերիկացի կոմիկ, պրոդյուսեր և քննադատ Բիլ Մարը խստորեն քննադատել են Costco ակումբային տիպի ինքնասպասարկման պահեստների՝ աշխարհի խոշորագույն ցանցի գործունեության դեմ: Նրանց խոսքով՝ ընկերությունը նպաստում է կենդանիների դեմ դաժան վերաբերմունքին՝ վաճառելով վանդակներում պահվող հավերի ձվերը, հայտնում է NEWSru.com-ը:
Հաղորդվում է, որ Փիթն արդեն համապատասխան նամակ է ուղարկել Costco-ի գործադիր տնօրեն Քրեյգ Ջելինեքին:
«Այդ թռչունները ձու են ածում անտանելի պայմաններում. Վանդակներում պահվում են 5 և ավելի հավեր՝ չնայած դրանցում բավականաչափ տեղ չկա, որպեսզի գոնե նրանցից մեկն ուղղի թևերը»,- գրել է Փիթը: Նա նաև հավելել է, որ այդպիսի վանդակների օգտագործումն արդեն արգելվել է Կալիֆոռնիա նահանգում և Եվրոպայի մեծ մասում:
Ընկերության ղեկավարությանը նման դիմում է հասցեագրել նաև Մարը: «Մեծաթիվ հետազոտություններն ապացուցել են, որ այդպիսի վանդակներում պահվող թռչունների ողնաշարը խախտվում է: Դրանցում երկար մնալու հետևանքով կենդանիներն անդամալուծվում են: Պատկերացրեք այսպիսի պատկեր՝ ինչ կլինի 5 կատվի կամ շան այդպիսի փոքր վանդակներ խցկելու դեպքում, իսկ դրանք դնել հարյուր հազարավոր վանդակների շարքում, և այդպես ամբողջ կյանքում… Դա, անխոս, կհանգեցնի քրեական գործի: Բայց երբ բանը հասնում է հավերին, դա բոլորին սովորական բան է թվում»,- գրում է նա:
Երկուսն էլ հանդես են եկել Farm Sanctuary ընկերության անունից, որը զբաղվում է դաժան վերաբերմունքից կենդանիների պաշտպանությամբ և պայքարում է դրանց արդյունաբերական բազմացման դեմ:
