Haqqin.az պորտալի փոխանցմամբ՝ ԱՊՀ երկրների վերաբերյալ Moody’s միջազգային վարկանիշային գործակալության տնտեսական վերջին հաշվետվությունում նշված է, որ ազգային արժույթների արժեզրկման հետ կապված անբարենպաստ գործոններն առավել սուր ձևով կանդրադառնան Ադրբեջանի, Բելառուսի ու Տաջիկստանի վրա։
Moody’s-ը կարծում է, որ Ռուսաստանում գրանցված ռեցեսիան (ՀՆԱ-ի կրճատում) ու նավթի համաշխարհային գնանկումը բացասաբար կազդեն ԱՊՀ 6 երկրների բանկերի վրա։ Այդ երկրներն են Հայաստանը, Ադրբեջանը, Ղազախստանը, Տաջիկստանը, Ուզբեկստանը, Բելառուսը։
Դրա պատճառը այդ երկրների ազգային արժույթների վրա ճնշման շարունակումն է, Ռուսաստանում աշխատող ԱՊՀ երկրների քաղաքացիների դրամական փոխանցումների ծավալի կրճատումը և ԱՊՀ-ից Ռուսաստան արտահանման անկումը։
Բացի այդ, նավթի համաշխարհային գնանկումը բացասաբար է ազդել Ադրբեջանում ու Ղազախստանում տնտեսական ակտիվության վրա, ինչը կհանգեցնի տեղի բանկերի ակտիվների որակի վատթարացման՝ թեև Ադրբեջանի ու Ղազախստանի պետական ծախսերը կայուն մակարդակի վրա պահելը հնարավորություն կտա որոշակիորեն մեղմել այդ ազդեցությունը։
