Ֆրանսիայում ազգային տոնին՝ հուլիսի 14-ին նշվող Բաստիլի գրավման օրը, խուլիգանները հրկիզել են 721 ավտոմեքենա: Այս մասին հայտնում է TASS-ը՝ հղում անելով այդ երկրի ՆԳՆ-ին:
Հաղորդվում է, որ իրավապահները 603 մարդու են ձերբակալել: Դեպքերի մեծ մասը տեղի է ունեցել հուլիսի 14-ի գիշերը: ՆԳՆ-ում նշում են, որ ավտոմեքենաների հրկիզումների թիվն այս տարի նախորդ տարվա համեմատ աճել է 23%-ով, ձերբակալվածների թիվը՝ 68%-ով:
Հուլիսի 15-ի գիշերվա իրադարձությունները ներառյալ, երբ դեռ շարունակվում էին տոնակատարությունները, ձերբակալվածների թիվը կազմել է 723:
Անկարգություններ են տեղի ունեցել Ֆրանսիայի մի շարք խոշոր քաղաքներում, մասնավորապես՝ Լիոնում: Այնտեղ հրկիզվել է մեծ սուպերմարկետ, խուլիգանները հարձակվել են հրշեջների և ոստիկանության պարեկային մեքենաների վրա:
Մեծ թվով դեպքեր են գրանցվել Սեն-Սեն-Դենի դեպարտամենտում, որտեղ ոչ միայն խանութներ, այլև դպրոցներ են հրկիզվել: Այստեղ ոստիկանությունը ձերբակալել է 110 մարդու:
Հասարակական կարգուկանոնի զանգվածային խախտումներ են գրանցվել նաև Փարիզում, որտեղ Բաստիլի գրավման օրը 145 մարդ է ձերբակալվել:
