Վրաստանում հետախուզման մեջ գտնվող նախկին նախագահ Միխեիլ Սաակաշվիլիին Ուկրաինա որպես Օդեսայի շրջանի նահանգապետ աշխատանքի հրավիրելը համարվում է ապտակ վրացի ժողովրդին: Այս մասին հայտարարել է այցով Մոսկվայում գտնվող Վրաստանի խորհրդարանի նախկին խոսնակ, ընդդիմադիր «Դեմոկրատական շարժում-միացյալ Վրաստան» կուսակցության առաջնորդ Նինո Բուրջանաձեն, գրում է RIA Novosti-ն:
«Ես բացառապես վստահ եմ, որ Ուկրաինայի համար դա շատ թանկ կարժենա, այսինքն` կրկնել այն նույն սխալները, որոնք կատարել ենք մենք` վրացիներս, այդ թվում՝ Ռուսաստանի հետ հարաբերություններում, այդ թվում` մեր սեփական պետության հետ հարաբերություններում: Եվ Սաակաշվիլիին գործերի գլխավոր խորհրդական նշանակելը ևս մեծ սխալ է: Չէ՞ որ նրա գլխավոր նպատակը ոչ թե այն հրդեհը հանգցնելն է, որ այժմ դժբախտաբար առկա է Ուկրաինայում, այլ հակառակը՝ կրակի վրա յուղ լցնելը, որպեսզի ավելի վատ լինի Ռուսաստանի հետ»,-ասել է Բուրջանաձեն:
