Ռուսական Ria Novosti լրատվական գործակալության փոխանցմամբ՝ «Վեցյակը» և Իրանը զգալի առաջընթաց են գրանցել Իրանի միջուկային ծրագրի վերաբերյալ համապարփակ համաձայնագրին առնչվող յուրաքանչյուր հարցում: Այդ մասին այսօր հայտարարել է ԱՄՆ պետդեպարտամենտի պաշտոնական ներկայացուցիչ Մարի Հարֆը:
«Մենք զգալի առաջընթացի ենք հասել (համաձայնագրի) ոլորտներից յուրաքանչյուրում, սակայն աշխատանքը շատ տեխնիկական է, իսկ խաղադրույքները բարձր են (բանակցային) գործընթացին մասնակից բոլոր երկրների համար»,- ասել է Մարի Հարֆը:
Ֆրանսիայի արտգործնախարար Լորան Ֆաբիուսն իր հերթին հայտարարել է, որ Իրանի միջուկային ծրագրի վերաբերյալ բանակցությունների ընթացքը բարդ է, սակայն շարունակվում են: Ֆաբիուսը հավելել է, որ Վիեննայից վերադառնում է Ֆրանսիա, որպեսզի մասնակցի երկրի խորհրդարանի կողմից Հունաստանում տիրող իրավիճակի վերաբերյալ քննարկումներին:
Ֆաբիուսը հայտարարել է, որ մտադիր է Վիեննա վերադառնալ հուլիսի 8-ին: Սրանից առաջ հաղորդվել էր, որ «Վեցյակի» և Իրանի միջև բանակցությունները երկարաձգվել են մինչև հուլիսի 10-ը:
