Ֆրանսիայի իշխանությունները արգելափակել են Իտալիայից ժամանող գնացքների մուտքը, քանի որ այնտեղից Ֆրանսիա են ժամանում Թունիսից Իտալիայի հարավային շրջաններ տեղափոխված հյուսիսաֆրիկյան փախստականները:
Այս մասին հաղորդում է Franec Presse գործակալությունը: Մինչդեռ Իտալիայում սկսել են զանգվածային կերպով մուտքի ժամանակավոր արտոնագրեր տրամադրել Հյուսիսային Աֆրիկայից ներգաղթածներին, ինչը թեպետ օրինական է, սակայն լուրջ դժգոհություններ է առաջացրել Իտալիայի հարևանների շրջանում: Իտալիայի ԱԳՆ-ն ֆրանսիացի կոլեգաներին ուղարկել է բողոքի նոտա: Իսկ Իտալիայի ներքին գործերի նախարար Ռոբերտո Մարոնին էլ հայտարարել է, թե «այդ գործողություններն անօրինական են և խախտում են Եվրամիության հիմնարար սկզբունքները»:
Ֆրանսիայի ներքին գործերի նախարարությունում ասել են, որ «գնացքների` Իտալիա մուտք գործելու արգելքը ժամանակավոր է և կապված է տեխնիկական խնդիրների հետ»: Ֆրանսիացիներն բացատրել են նաև, թե «գնացքների մուտքը դադարեցվել է այն պատճառով, որ Ֆրանսիայի սահմանից 7 կմ հեռավորության վրա տեղի են ունենում բողոքի ակցիաներ, որին մասնակցում են Ֆրանսիայի և Իտալիայի քաղաքացիներ»:
Հիշեցնենք, որ Թունիսում և Լիբիայում տեղի ունեցող հեղափոխական իրադարձությունների ֆոնին Հյուսիսային Աֆրիկայից մի քանի տասնայկ հազար մարդ տեղափոխվել է Իտալիայի հարավային շրջաններ և Մալթա` հումանիտար աղետ առաջացնելով իտալական որոշ քաղաքներում: Իտալիայի իշխանությունները որոշում են կայացրել ներգաղթյալների մի մասին արտաքսել իրենց երկրներ, իսկ մյուսին` տրամադրել Շենգենյան տարածքում ժամանակավոր կեցության իրավունք: