Երևանի քաղաքապետարանի տրանսպորտի վարչության պետ Հենրիկ Նավասարդյանը միանգամայն դրական է համարում քաղաքում կարմիր գծանշումների առկայությունը: Նրա խոսքով՝ այդ գծանշումների առկայության արդյունքում մեկ տարվա ընթացքում քաղաքի բյուջե է մուտք եղել ավելի քան 200 միլիոն դրամ: «Մինչև կարմիր գծանշումների կատարելը Երևանի քաղաքապետարանը մինչև 50 միլիոն դրամի չափով եկամուտ էր մուտք արվում, իսկ միայն անցած տարի, չհաշված ծառայողականները, վճարումն անցել է 200 միլիոնի սահմանը: Դրան էլ 50 միլիոնի չափով գումարվել է ծառայողական մեքենաների վճարումները»,- ասաց Նավասարդյանը:
Տրանսպորտի վարչության պետը, անդրադառնալով քաղաքային տրանսպորտի որակին, համաձայնեց, որ որոշ երթուղիների դեպքում վիճակն իրականում անմխիթար է: Ասաց, որո որոշների դեպքում իրենք անգամ դադարեցնում են տրանսպորտի շահագործումը, մինչև դրանց նորոգումը:
Նավասարդյանը նշեց, որ իրենք պարբերաբար մրցույթներ են հայտարարում, շուրջ 24 երթուղիներով մրցույթ չէր իրականացվում, սակայն այդպես էլ այդ երթուղիները շահագործողների հայտ չի ներկայացվել:
Տրանսպորտի վարչության պետը, անդրադառնալով երթուղիների միավորման խնդրին, նշեց, որ այսօրվա վիճակով շուրջ 7 ավտոբուսային երթուղի է հրաժարվել երթուղին սպասարկելուց, դրա համար էլ իրենք երթուղիների միավորում իրականացրեցին, որպեսզի ժողովուրդը կարողանա տեղաշարժվել: «Այնուամենայնիվ երթուղին սպասարկողների մոտ այսօր էլ ուղևորահոսքի նվազման հետ կապված դժգոհություն կա, բայց մենք կարողանում ենք ուղևորափոխադրումն այնպես կազմակերպել, որ մեր ժողովուրդը փողոցում չմնա»,- ասաց Նավասարդյանը:
Նա նաև նշեց, որ տրանսպորտի սակագնի վերաբերյալ ուսումնասիրություններն ավարտվել են, և պարզվել է, որ առաջիկայում տրանսպորտի գնի բարձրացում չի սպասվում:
Առավել մանրամասն՝ տեսանյութում
