Ադրբեջանի նախագահ Իլհամ Ալիևի դուստրը՝ Լեյլա Ալիևան, ով նաև Հեյդար Ալիևի ֆոնդի նախագահն է, իր Instagram-ի էջում հայտարարել է իր և երգիչ Էմին Աղալարովի ամուսնալուծության մասին, հայտնում է lenta.ru-ն:
Նա ասել է, որ Ադրբեջանում շատերի համար գաղտնիք չէր, որ իրենք վաղուց առանձին էին ապրում և ժամանակը եկել է, որ պաշտոնապես ձևակերպեն իրենց ամուսնալուծությունը և ավելացրել է, որ իրենք որոշել են մնալ ընկերներ և դաստիարակեն երեխաներին միասին:
Ալիևան և Աղալարովն ամուսնացել են 2006-ի ապրիլին, իսկ 2008-ի դեկտեմբերին ծնվել են նրանց զույգ տղաները:
Լեյլա Ալիևան ծնվել է 1985-ի հուլիսի 3-ին Մոսկվայում, բայց մեծացել է Բաքվում: Նա սովորել է Եվրոպական բիզնես դպրոցում և շարունակել է կրթությունը Մոսկվայի միջազգային հարաբերությունների ինստիտուտում: 2007-ի մայիսից նա ղեկավարում է Հեյդար Ալիևի ֆոնդը Մոսկվայում:
Էմին Աղալարովը ծնվել է 1979-ի դեկտեմբերի 12-ին Բաքվում, մեծացել է Մոսկվայում, սովորել է ԱՄՆ-ում: 2006-ի թողարկել է առաջին ալբոմը՝ «Still», 2011-ին ներկայացվել է Գրեմմի մրցանակին: Ներկայումս նա Crocus Group ընկերության փոխնախագահն է:
