ԱԺ անկախ պատգամավոր Վիկտոր Դալլաքյանն այսօր ԱԺ-կառավարություն հարցուպատասխանի ժամանակ հարցրեց, թե կառավարությունն ի՞նչ կոնկրետ քայլեր է իրականացնում` ՀՀ պարենային անվտանգության հարցերը լուծելու և բնակչությանը որակյալ սննդամթերքով ապահովելու ուղղությամբ:
Վիկտոր Դալլաքյանը, մեջբերելով մամուլի հրապարակումները, մտահոգություն հայտնեց, որ Հայաստանում տարածվում է գենետիկորեն ձևափոխված սնունդ: Գյուղատնտեսության նախարար Սերգո Կարապետյանը, սակայն, հերքեց մամուլի հրապարակումները: Ըստ նրա` Հայաստանում սննդի անվտանգության ոլորտում բարեփոխումներ իրականացվել են, մասնավորապես գործում է սննդի անվտանգության պետական ծառայությունը:
Արձագանքման իրավունքով խոսք վերցնելով` Դալլաքյանը նկատեց, որ իր մատնանշած փաստերի վերաբերյալ նախարարության գրավոր պատասխանի մեջ չկա որևէ հերքում: «Մոտ ապագայում հանրային քննարկման է ներկայացվելու ՀՀ-ում սննդամթերքի անվտանգության ռազմավարությունը»,- կառավարությունից իրեն ուղարկված նամակից ընթերցեց նա ու եզրակացրեց. «Այսինքն` 20 տարվա պետությունը չունի սննդամթերքի անվտանգության ռազմավարություն, ինչն անթույլատրելի երևույթ է, քանի որ աղքատության պայմաններում մեր ժողովրդին մատակարարվում է վտանգավոր սնունդ»:
