2004-ին Միացյալ Թագավորության այն ժամանակվա վարչապետ Թոնի Բլերը Ուելսի արքայազն Չարլզի հետ մասնավոր նամակագրությունում խոստովանել է Իրաքի պատերազմին նախապատրաստվելիս իր կառավարության թերությունները: Այս մասին գրում է TASS-ը՝ վկայակոչելով բրիտանական ԶԼՄ-ներին:
Այդ նամակների գոյությունը մամուլում մեծ աղմուկ է բարձրացրել: Չէ՞ որ միապետը երկիրը ղեկավարում է միայն անվանապես, և արքայական ընտանիքի անդամները զրկված են քաղաքական կյանքին միջամտելու իրավունքից:
Նամակներում արքայազնը քննադատել է բրիտանական Lynx ուղղաթիռները և պահանջել մեծացնել զինված ուժերի ֆինանսավորումը: Վարչապետը հայտարարել է, որ «տեղյակ է առկա խնդրից», և գանգատվել է «զգալի ճնշումից», որը ռազմական գործողությունները ցուցաբերում են երկրի բյուջեի վրա:
Բացի դրանից, արքայազնը փորձել է ազդել կառավարության վրա՝ մասնավոր ֆերմերներին տնտեսական խթաններ ցուցաբերելու հարցերում, հանել այլընտրանքային բժշկական դեղամիջոցների վրա դրված սահմանափակումները և նույնիսկ բարձրացնել դպրոցական ճաշերի որակը։
Ինչպես նշում են ԶԼՄ-ները, հրապարակված նամակները չպետք է բացասաբար ազդեն արքայազն Չարլզի՝ որպես միապետի, ապագայի վրա, որովհետև դրանք վկայում են, որ գահաժառանգը «իսկապես անհանգստանում է» իր հպատակների համար:
