«Պզոն» եւ եւս 50 հայ՝ ձերբակալված ԱՄՆ-ում

18 Հոկտեմբեր, 2010 19:46

Դիտումներ՝ *

Ինչպես այս գիշեր հայտնել է ԱՄՆ գլխավոր դատախազությունը, բացահայտվել է բժշկական օգնության համակարգում խարդախության ամենախոշոր հանցագործությունը:
Հաղորդագրության մեջ ասվում է, որ Արդարադատության նախարարությունն անցկացրել է աննախադեպ գործողությունների շարք, որի ընթացքում Կալիֆորնիայում, Նյու-Մեքսիկոյում, Օհայոյում, Ջորջիայում եւ Նյու-Յորքում ձերբակալվել է 73 մարդ: Ինչպես հաղորդում է Los Angeles Times-ը, հանցագործ խումբը հայտնի է «Միրզոյան-Թերջանյան» անունով: Կեղծ փաստաթղթերով ստեղծվել են գոյություն չունեցող կլինիկաներ եւ վարձվել են բժիշկներ, որոնք այդ կլինիկաներ են ուղարկել գոյություն չունեցող հիվանդների, որոնց «բուժման» համար Medicare ծրագրով հանցագործները ստացել են $163 մլն: Գլխավոր դատախազության տվյալներով, այս խմբի ղեկավարներն են եղել Դավիթ Միրզոյանն ու Ռոբերտ Թերջանյանը, ովքեր գործել են համապատասխանաբար Գլենդելում եւ Նյու-Յորքում: Թերթի փոխանցմամբ, այս գործի շրջանակներում ձերբակալվել է նաեւ հանցավոր աշխարհում հայտնի «օրենքով գող» Արմեն Ղազարյանը` «Պզո» մականունով:
Արմեն Ղազարյանը վերջին անգամ ձերբակալվել է 1996թ.:
Ըստ որոշ աղբյուրների ձերբակալվածներին սպառնում է մինչեւ ցմահ բանտարկություն եւ 1 մլն դոլար տուգանք:
Նախկինում մամուլում եղել են նյութեր, համաձայն որոնց՝ «Պզո» մականունով Արմեն Ղազարյանը գործընկերային հարաբերություններ ունի ԱԺ պատգամավոր, ՀՀ նախագահ Սերժ Սարգսյանի եղբոր՝ Սաշիկ Սարգսյանի հետ: