Ջեյմս Բոնդի հոբելյանական տարին ավարտվել է, սակայն մասնագետները շարունակում են նոր անակնկալներ մատուցել 007 գործակալի սիրահարներին: Շշուկներ են տարածվել, որ Բոնդի մասին պատմող առաջին՝ «Բժիշկ Նոու» (1962 թ.) լրտեսական մարտաֆիլմը, որի գլխավոր դերակատարը Շոն Քոներին է, կրկին կհայտնվի մեծ էկրանին՝ այս անգամ 3D ձևաչափով:
Ինչպես հաղորդում է Collider պարբերականը, վերջերս «Բժիշկ Նոու» ֆիլմի 3D տարբերակը ներառվել է Blu-Ray-ի թայվանական տարբերակում: MovieFone կայքում նույնպես նման հայատարարություն է տարածվել: Այս տեղեկատվությունը պաշտոնապես դեռևս չի հաստատվել:
Միևնույն ժամանակ հայտնի է դարձել, որ 007 գործակալի մասին շոտլանդացի գրող Ուիլյամ Բոյդի գիրքը վաճառքի կհանվի սեպտեմբերի 26-ին: Սյուժեի մանրամասները դեռևս գաղտնի են պահվում: Հայտնի է միայն, որ գործողությունները ծավալվում են 1969 թ.:
Դանիել Քրեյգի դերակատարմամբ Ջեյմս Բոնդի մասին պատմող 24-րդ ֆիլմի պրեմիերան նշանակված է 2014 թ. աշնանը:
