Ամերիկյան WNWI ռադիոն հաղորդում է, որ Ադրբեջանը, չնայած Իրանի հետ պատմական և մշակութային սերտ կապերին, ընդհանուր շահեր ունի Իսրայելի՝ Իսլամական Հանրապետության մահացու թշնամու հետ:
Ռադիոկայանը նշում է, որ Արևմուտքում շարունակում են քննարկել «իրանական խնդիրը»: Շատ փորձագետների կարծիքով՝ Իրանին հարվածելու դեպքում հակամարտության կենտրոնում կարող է հայտնվել Ադրբեջանը:
Ռադիոկայանը մասնավորապես անդրադարձել է Վաշինգտոնի Մերձավոր Արևելքի ինստիտուտի փորձագետ Ալեքս Վատանկին, որը հայտարարել է, թե «Ադբեջանը, չնայած Իրանի հետ սերտ պատմական և մշակութային կապերին, ընդհանուր շահեր ունի Իսրայելի՝ Իսլամական Հանրապետության մահացու թշնամու հետ և շատ հարցերում գործում է՝ նրա շահերից ելնելով»:
Նշենք,որ վերջին ժամանակներս հաճախակի են դարձել հիշեցումներն այն մասին, որ Իսրայելը Իրանին կհարվածի Ադրբեջանի տարածքից: Բաքվի պաշտոնական իշխանություններն, իրենց հերթին, հերքում են այս տեղեկատվությունը:
«Կավկազսկայա պոլիտիկա» ռեսուրսը գրում է, որ Իսրայելն ընտրել է այլ մարտավարություն: Նա ոգեշնչում է հարավային ադրբեջանցիների անկախության ձգտումը և հրահրում է Ադրբեջանին սատարել հայրենակիցներին ու այլ հակաիրանական քայլերի:
Ռեսուրսը մեջբերում է անկախ լրագրող Նիկ Գրեյսի բառերն այն մասին, որ «1996 թ. եթեր է սկսել հեռարձակվել «Հարավային Ադրբեջանի ձայն» ռադիոկայանը, որը ակնհայտ կապեր ունի Իսրայելի հետ: Մասնավորապես, Գերմանիայի հեռուստակոմունիկացիայի բաժնի տվյալներով՝ ռադիոկայանը տեղակայված է Իսրայելում: Իսկ գերատեսչության աշխատակից Վոլֆանգ Բուշելի խոսքերով՝ ՀԱՁ-ի ազդանշանը հաճախ խառնվում է իսրայելական KOL ռադիոկայանին, իսկ դա տեղի է ունենում, երբ երկու ռադիոհաղորդիչներ միմյանց մոտ են գտնվում»:
Today’s Zaman թերթի լրագրող Ամանդա Փոլի կարծիքով՝ ադրբեջանա-իրանական հակամարտության սրումը կարող է աղետ դառնալ ինչպես Իրանի և Ադրբեջանի, այնպես էլ ողջ տարածաշրջանի համար:
Նա նշում է,ո ր Իսրայելի հետ համագործակցելով՝ Բաքուն իրեն գցում է ծուղակի մեջ, որից հետո չի կարող դուրս գալ:
