Նախկին հանրապետական սենատոր Չակ Հեյգելը, որը ԱՄՆ նախագահ Բարաք Օբամայի կողմից առաջադրվել էր որպես ԱՄՆ պաշտպանության նախարարի թեկնածու, երկար քննարկումներից հետո, ըստ ամենայնի, կհաստատվի նոր պաշտոնում:
Ամերիկյան Սենատը, որտեղ մեծամասնություն են կազմում դեմոկրատները, այս հարցի քննարկմանը կվերադառնա 1 շաբաթ անց, երբ Կոնգրեսում ավարտվի ազգային տոնը՝ Նախագահի օրըա: Այս մասին հաղորդում է ITAR-TASS-ը:
«Չեմ կարծում, թե Հեյգելը հարմար է այդ պաշտոնին, սակայն մեզ այլևս հարկավոր չէ զսպել նրա հաստատումը Պենտագոնի ղեկավարի պաշտոնում»,- NBC հեռուստաընկերությանը տված հարցազրույցում հայտարարել է հանրապետական սենատոր Ջոն Մաքքեյնը, որը նախագահի նշանակման դեմ արշավի նախաձեռնողներից է:
Նրա խոսքով՝ սենատորներն ունեին բավականաչափ ժամանակ՝ ուսումնասիրելու այն բոլոր հարցերի պատասխանները, որոնք առաջ էին քաշվել Հեյգելի ու Օբամայի վարչակազմի դեմ:
«Մենք կքվեարկենք, որպեսզի վերսկսենք աշխատանքը, և ես վստահ եմ, որ Հեյգելը կհավաքի անհրաժեշտ ձայներ»,- ասել է Մակքեյնը:
Ավելի վաղ Հեյգելը ստիպված էր գրավոր պատասխանել սենատորների հարյուրավոր հարցերին, ապա մասնակցել Զինված ուժերի հարցով կոմիտեի նիստերին, որոնք շարունակվել էին 9 ժամ:
Բացի այդ՝ Մաքքեյնը իր գործընկերների հետ Սպիտակ տնից պահանջել էր հավելյալ տեղեկություն տրամադրել Լիբիայի Բենղազի քաղաքում ահաբեկիչների հարձակման մասին՝ նախազգուշացնելով, որ մինչև տեղեկությունները չստանան, Հեյգելը չի հաստատվի վերոնշյալ պաշտոնում:
Սպիտակ տունը, լրջորեն անհանգստացած Հեյգելի նշանակման շուրջ բարձրացած աղմուկից, շտապել էր բավարարել հանրապետականների հետաքրքրությունը:
Պենտագոնի ներկայիս ղեկավար Լեոն Պանետան, իր իսկ խոստովանությամբ, արդեն հավաքել է իրերն ու սպասում է այն րոպեին, թե երբ Վաշինգտոնից կգնա Կալիֆոռնիայի իր ռանչո:
