«Իշխանությունը վայնասուն է դրել՝ հանցագործության բնույթի հայտարարություններով». ազատամարտիկ

«Առաջին լրատվական»-ի զրուցակիցն է ՀԽ վարչության անդամ, ազատամարտիկ Գագիկ Սարուխանյանը:

-Հանրապետական խմբակցության ղեկավար Վահրամ Բաղդասարյանն ասել էր, որ Ժիրայր Սեֆիլյանից ու նրա  ընկերներից բացի պետք է մեկուսացնել նաև նրանց, ովքեր կոչ են անում ապրիլի 24-ին հանրահավաք անցկացնել։ Հայտարարությանը ինչպե՞ս եք վերաբերում, արդյոք Ալեք Ենիգոմշյանին և Երեմ Խոնդկարյանին հրավիրել են Քննչական կոմիտե այս համատեքստում:

-Չէի ասի, բայց սրանցից ամեն ինչ էլ սպասելի է: ՀԽ –ն այդ անձի ասածներին անդրադարձել է.  բաց նամակով հայտարարություն է տվել հանցագործության մասին: Այսինքն`  այդ հայտարարությունը ինքնին արդեն իսկ հանցագործություն է: Եթե հանրահավաքը արտոնված է, եթե մարդը երկրում ազատ տեղաշարժի, խոսքի  իրավունք ունի, ի՞նչ է նշանակում այս հայտարարությունը, այսինքն բացահայտորեն բռնանում են ազատ խոսքին և ազատ տեղաշարժին: Պատահական չէ, որ, պայմանականորեն ասած,  այս իշխանություններին կոչել ենք ռեժիմ: Մենք ռեժիմի օրոք ենք ապրում: Այսինքն՝ օտարի կողմից նվաճված մեր երկրում շատ մարդկանց թվացել է, թե ազատ և անկախ Հայաստանում ենք ապրում, բայց իրականում կատարել են իրենց սև գործը: Սև գործ ասվածը ՝ սպիտակ եղեռն  է: Այսօր ձայն ենք բարձրացնում ի լուր աշխարհի, որ Ցեղասպանության 100-ամյակը պարտադիր պետք է  աշխարհի կողմից ճանաչվի, որպեսզի չկրկնվեն նման բաներ, բայց 100-ամյակի շեմին մենք ունենք նույն պատկերը ներսում ՝ սպիտակ ցեղասպանության պատկերով: Ինչո՞ւ մենք չպետք է խոսենք, թե 1915 թ-ի ցեղասպանության մասին, թե ռեժիմի կողմից իրականացվողի: Ի՞նչն է տարբերությունը: Այստեղ են ռեժիմի երկակի ստանդարտները , այսինքն ՝ ուզում են աշխարհին ցույց տալ ՝ տեսեք մենք լավն ենք, լեգիտիմ  իշխանություն ենք, մենք իրոք ընտրված ենք, բայց իրականում բռնազավթել են իշխանությունը:

Մենք գիտակցում էինք, որ յուրաքանչյուր քայլի այս սրիկաները կարող են դիմել: Այս մի հայտարությունը չի , որ մեզ պիտի զգոն պահի. մենք ունենք բազմաթիվ դեպքեր: Անգամ երիտասարդ քայլեր անող ՀԽ-ի նկատմամբ բռնություններ են կիրառվում, մինչև ՀԽ-ի հայտնվելը` ևս:

Կոնկրետ ՀԽ-ի նկատմամբ Գևորգ Սաֆարյանի ծեծը, այրված մեքենաները, Բերձորը, կալանավորումները: Մենք մտնելով այս պայքարի մեջ, գիտակացում էինք, որ այս սրիկանները յուրաքանչյուր քայլի կարող են դիմել: Եվ ինչո՞ւ է մեր շարժումը իրենց համար  վտանգավոր, քանի որ տղաները  վճռական  համախմբվել են այս իշխանություններին հեռացնելու համար:

-Ալեք Ենիգոմշյանի նկատմամբ արդյոք պատրաստվո՞ւմ են մեղադրանք ներկայացնել, թե  ուղղակի հարցաքննում են :

-Ալեք Ենիգոմշյանի հետ զրուցել եմ, նա գործում ներգրավված է որպես վկա: Չնայած ես չեմ հասկանում  ի՞նչու  են այդ մարդուն վկա ներգրավում, եթե խախտում չկա: Ես չէի ուզի վատ կողմը քննարկել, գուցե կհարցաքննեն և վերջ:

-Հաջողության ի՞նչ հեռանկարներ եք տեսնում, քանի որ, որպես կանոն, Հայաստանում, նրանք ովքեր պայքարի կոչեր են անում, վերջում պայքարի հրապարակում հանրությանը թողնում  են մենակ:

-Չէ, բացառվում է, որ հանրությանը մենակ թողնենք: Մենք ի սկզբանե ենք ասել, որ հանրությանը մենակ չենք թողնելու ռեժիմի դեմ: Այլ բան է, որ,  հանրության հետ համաձայնության գալով , որոշակի փոփոխություն կատարենք ռազմավարության մեջ: Որպեսզի չստեղծենք Մարտիմեկյան դեպքեր: Մենք հստակ կարող ենք ասել , հարցում ենք անցկացրել 80 տոկոսից ավելին հստակ ասում են , որ այս ռեժիմը պետք է հեռացվի: 10-12 տոկոսը չի կողմնորոշվում վախի պատճառով:

-Օրինակ` Ծառուկյանը պայքարի համար նաև  ռեսուրսներ  ուներ, բայց տեսանք ի՞նչ հանգուցալուծում ստացավ:

-Կներեք, մի համեմատեք: Ծառուկյանն  իշխանությունների հետ կոալիցիա կազմած,  միասին որոշումներ են կայացրել, միասին երկիրը թալանել են, միասին բերել հասցրել են այս վիճակին, միասին ստրկության են սովորեցրել: Ծառուկյանի կողմից նշված առավելությունը ժողովրդի մեջ տարածված է՝ «նա գոնե բաժանում էր», բայց ինքն ամենամեծ վնասն էր հասցնում: Այսինքն` սովորեցնում էր թամբալության, ստրկության, հանրահայտ ասացվածք կա՝ տվեք կարթը, ձուկը մենք կբռնենք, Ծառուկյանը տալիս էր ձուկը, բռնելու ձևը չէր սովորեցնում: Իսկ ով էլ ուզենար` իր կարթով մի բան բռներ, ամպայման կճզմեին: Ինքն ի՞նչ, մոնոպոլիստ չէր:

 

Հարցազրույցն ամբողջությամբ՝ տեսանյութում