Հայաստանն ընդդիմության կարիք ունի: Այսօր լրագրողների հետ հանդիպման ժամանակ ասաց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը՝ անդրադառնալով նախագահական քարոզարշավին: Նրա խոսքով՝ նախագահական ընտրարշավի այն սցենարը, որը կարելի էր կանխատեսել նախագահական ընտրարշավին ընդդիմության մասնակցության դեպքում չստացվեց, ընդդիմություն չձևավորվեց: Սակայն, ըստ քաղաքագետի, ներկայիս իրողությունները ցույց են տալիս, որ հասարակությունը հղի է ընդդիմությամբ:
«Լևոն Տեր-Պետրոսյանի՝ կուսակցություն ստեղծելու քայլը ընդդիմության լայն ֆրոնտի ձևավորման փորձ է, Ծառուկյանը կարծես փորձում է ներիշխանական բուրգում ընդդիմություն ստեղծել, սակայն Ժամանակ կպահանջվի: Հայաստանն ընդդիմության կարիք ունի, որ իշխանությունը հիմնվի մեկ այլ սխեմայի վրա: Այսօր հետընթաց քայլ ենք արձանագրում, բայց պետք է հուսալ, որ մի օր կձևավորվի ընդդիմություն և ծաղրածուներին այլևս ուշադրություն չենք դարձնի»,- մեկնաբանեց Ալեքսանդր Իսկանդարյանը:
Անդրադառնալով հարցին՝ ինչո՞ւ նախագահի թեկնածուները ծրագրեր չներկայացրին ընտրարշավի ընթացքում՝ ասաց, որ նախորդ խորհրդարանական ընտրություններում հասարակության ձայների մեկ երրորդը ստացավ Գագիկ Ծառուկյանը, ում քարոզարշավը կենացներից էր բաղկացած: «Երբ հասարակությունը կպահանջի ծրագրերը, թեկնածուները կներկայացնեն ծրագրեր: Պետք է նման քաղաքական մշակույթ ձևավորվի»,- նշեց բանախոսը՝ շարունակելով, որ ընտրությունները շուկա է, վաճառվում է այն, ինչ պահանջում են:
Լուսանկարը՝ PanARMENIAN Photo-ի