Հիմնադիր խորհրդարանի ուրբաթ օրվա հրավիրած հանրահավաքի ընթացքում ազատամարտիկ Խաչիկ Ավետիսյանը հայտարարեց՝ երկուշաբթի օրվանից մոտ 50 ազատամարտիկ հացադուլ են հայտարարելու՝ իրենց ձերբակալված ընկերներին ազատ արձակելու պահանջով:
Խաչիկ Ավետիսյանը նշեց, որ իրենց նստացույցով կմիանան այլ ազատամարտիկներ ևս, պարզապես շատերն առողջական խնդիրներ ունեն և հացադուլ անել չեն կարող: «Առաջին լրատվական»-ը «Ապարան» ջոկատի հրամանատար, ազատամարտիկ Ռազմիկ Պետրոսյանից տեղեկացավ, որ «Ազատամարտիկների դաշինքը» հացադուլին չի միանալու:
–Պարոն Պետրոսյան, «Հիմնադիր խորհրդարան»-ի հանրահավաքի ընթացքում ազատամարտիկ Խաչիկ Ավետիսյանը հայտարարեց, որ Ժիրայր Սեֆիլյանին, Պավլիկ Մանուկյանին և մյուսներին ազատ արձակելու պահանջով հացադուլ և նստացույց են սկսում Ազատության հրապարակում, Դուք միանո՞ւմ եք այդ նախաձեռնությանը:
–Մենք միշտ մեր յուրաքանչյուր խոսքին հետևողական ենք ու հայտարարել ենք, որ «Ազատամարտիկների դաշինքը» ոչ մի քաղաքական գործընթացի չի մասնակցելու մինչև 100-ամյակի ավարտը: Մենք երեկ մասնակցել ենք հանրահավաքին, դատապարտել ենք մեր ազատամարտիկ ընկերներին անազատության մեջ պահելու համար: Իսկ քաղաքական գործընթացներին չենք մասնակցելու։ Իհարկե, զորակցություն հայտնելու ենք, նրանց տեսակցելու ենք, բայց հացադուլին և քաղաքական գործընթացներին չենք մասնակցելու:
–Այսինքն՝ հացադուլավորների՞ն եք տեսակցելու, թե՞ անազատության մեջ հայտնվածներին:
–Այո, բոլորին: Իրենք մեր մարտական ընկերներն են: Մենք կոչ ենք արել իշխանություններին, որ իրենք մինչև ապրիլի 24-ը բոլոր քաղբանտարկյալներին ազատ արձակեն, մենք համոզված ենք, որ նրանք քաղբանտարկյալ են: Քանի որ նրանց մեջ կան մեր ազատամարտիկ ընկերները, մենք չէինք կարող անտարբեր մնալ:
–Իսկ եթե նույնիսկ ապրիլի 24-ից հետո ազատ չարձակեն, հնարավո՞ր է միանաք հացադուլ հայտարարածներին:
–Մենք իշխանափոխության գործընթացը երբեք մեր օրակարգից դուրս չենք հանել: Քանի այս իշխանությունները կան, մենք պետք է պահանջենք: Մենք մեր ազգի ցավի հետ կապված՝ հիմա չենք ուզում խանգարել, ոչ էլ այդ գործընթացների ժամանակ ներքաղաքական խնդիրներ առաջ քաշել: Դրա համար այդ միջոցառւմները կավարտվեն, նոր մենք կմտածենք մեր անելիքների մասին:
–Փաստորեն, երեկ Խաչիկ Ավետիսյանն իր անձնական կարծիքն է արտահայտել:
–Երեկ ելույթ ունեցավ նաև Սմբատ Հակոբյանը, որը ըստ էության նույն բանը հայտարարեց, ինչ ես եմ հիմա ասում: Իսկ Խաչիկ Ավետիսյանն իր անձնական կարծիքն է հայտնել, կան ազատամարտիկներ, որոնք իրեն կմիանան: Բայց դա դաշինքի հայտարարությունը չէր: Նա մեր մարտական ընկերն է, եղել է դաշինքի անդամ, բայց հիմա դաշինքի ու խորհրդի անդամ չէ, հիմա իր անունից հայտարարություն է արել: Ես հույս ունեմ, որ իշխանությունները հետևություն կանեն, ու մեր տղեքն ազատության մեջ կհայտնվեն: Իրենք մեր երկրի համար կյանք են տվել ու անազատության մեջ նրանց պահելը հանցագործություն է, մանավանդ որ՝ նրանք երբեք այս երկրի համար չարիք չեն եղել, հակառակը՝ կռվել ու արյուն են թափել:
