Օսկանյան-Ծառուկյան վերջին շրջանում լարված հարաբերությունները, որ կապված էին Օսկանյանի դեմ հարուցված քրեական գործի առնչությամբ Ծառուկյանի և ԲՀԿ պահվածքի հետ, տեղատվություն են ապրել: Ինչպես տեղեկացնում են ԲՀԿ-ին մոտ կանգնած «Հրապարակի» աղբյուրները, նրանք վերջերս «լավ բարիշել են»:
Ըստ նույն աղբյուրների՝ Ծառուկյանի մոտ, ոչ նախկին ինտենսիվությամբ, շարունակվում է անկումային տրամադրությունը, նա դեռևս ցանկություն չունի հավաքելու իր կուսակցական ակտիվին՝ քննարկելու այդպես էլ պատասխան չստացած մի շարք հարցեր, ավելին՝ առաջին անգամ Աժ մտած Ծառուկյանի այցը հույս է արթնացրել խմբակցության պատգամավորների մոտ, որ վերջապես նա ֆրակցիայի նիստ կհրավիրի, ինչը դեռ չի արդարացել:
Ծառուկյանն այս փուլում առաջնորդվում է «ոչ նալին, ոչ մեխին» սկզբունքով, տեղեկացնում են նրա մտերիմները: Նա երկու նախագահների՝ Սերժ Սարգսյանի և Ռոբերտ Քոչարյանի հետ փորձում է պահպանել բալանսը. Սերժ Սարգսյանի հետ՝ Հովիկ Աբրահամյանի միջոցով, Ռոբերտ Քոչարյանի հետ՝ անձամբ: