«Առավոտյան ժամը 6:45-ին դուռը զարկեցին, մենք, իհարկե, դեռ քնած էինք, Ժիրայրը ինքը դուռը բացեց։ Նա տեսավ, որ ազգային անվտանգության, քննչական կոմիտեի մի խումբ աշխատակիցներ են, ներկայացան, խուզարկության փաստաթուղթ ունեին՝ 225 հոդվածի համաձայն: Զենք էին ման գալիս»,-«Առաջին լրատվական»-ի հետ զրույցում պատմեց Ժիրայր Սեֆիլյանի կինը՝ Նանոր Սեֆիլյանը:
Նա նաև տեղեկացրեց, որ Ժիրայր Սեֆիլյանին ոչ թե բերման են ենթարկել, այլ հրավիրել են հարցաքննության:
Նանոր Սեֆիլյանը նշեց, որ խուզարկությունը տևել է մոտ 3.5 ժամ. «Տարել են Ժիրայրի մի քանի անձնական իրեր, որոնց մեջ իր զինվորական պայուսակներն էին, պատերազմի ժամանակից մնացած զինվորական իրերը, համակարգիչներ»,- մանրամասնեց Նանոր Սեֆիլյանը:
Նա նաև ասաց, որ այդ իրերի շարքում դանակ է եղել: Ժիրայր Սեֆիլյանի կնոջ կարծիքով՝ այս ամենը կապված է ապրիլի 24-ի պրոցեսի հետ. «Եթե խուճապի մեջ չըլլային, կգային, կտանեին, զենք չկա՝ ուրիշ բան կմոգենեն՝ մինչև ապրիլի 24-ը կպահեն։ Առաջին անգամը չի՝ Ռոբերտ Քոչարյանի օրոք էլ Ժիրայրը ձերբակալվեց»,- նշեց նա:
Նանոր Սեֆիլյանը նաև տեղեկացրեց, որ այս պահին դեռ փաստաբանի չեն դիմել, բայց դիմելու են:
Մանրամասները՝ տեսանյութում։
