Մալիում ԱՄՆ նախկին դեսպան Վիկի Հադլսթոնը Ֆրանսիային մեղադրել է «իսլամական Մահրիբի երկրներում «Ալ-Կաիդա»-ին ֆինանսավորելու համար: Ըստ նրա՝ Ֆրանսիան աֆրիկյան զինյալների կողմից գերեվարված իր քաղաքացիների ազատագրման համար վճարել է 17 մլն դոլար: Արդյունքում, ինչպես հաստատում է Հադլսթոնը, այդ գումարներն ընկել են Ալ-Կաիդա»-ի ձեռքը, որի դեմ ֆրանսիական բանակն այժմ պայքարում է Մալիում:
Ինչպես տեղեկացնում է ամերիկացի դիվանագետը, խոսքը 4 ֆրանսիացիների մասին է, որոնց 2010 թ. առևանգել էին Առլիտ քաղաքի ուրանի հանքավայրից: Այդ ժամանակ Ֆրանսիայի կառավարությունը համաձայնել էր վճարել նրանց ազատագրման համար: 17 մլն դոլարը Փարիզը հանձնել էր Մալիի կառավարությանը, որն էլ պետք է որոշում կայացներ ֆրանսիացիների ազատագրման մասին: Ըստ Հադլսթոնի, արդյունքում վճարված գումարի մի մասն ընկել է արմատական իսլամիստների ձեռքը, իսկ գերիներն այդպես էլ ազատ չեն արձակվել:
2011 թ. նոյեմբերին Մալիի Խոմբորի քաղաքում ևս 2 ֆրանսիացիներ էին գերեվարվել, իսկ 2012 թ. նոյեմբերին՝ մի հոգի:
Տարբեր ժամանակներում գերի ընկած 7 ֆրանսիացիները գտնվում են երկրի հյուսիս-արևելքում: Ֆրանսիան պաշտոնապես հերքել է իր կողմից փրկագին վճարելու փաստը:
2013 թ. հունվարից ֆրանսիական զինված ուժերն օգնում են Մալիի բանակին՝ իսլամիստներից երկրի հյուսիսը ազատագրելու գործում: Ֆրանսիացիների մի քանի շաբաթյա միջամտության արդյունքում հաջողվել է ազատագրել մի քանի խոշոր քաղաքներ: Մարտից Փարիզը կսկսի իր ուժերը դուրս բերել: Ֆրանսիան պնդում է, որ, որքան հնարավոր է շուտ, ՄԱԿ-ն իր խաղաղապահ ուժերը մտցնի Մալի: