Այսօր Երևանի Խաչատուր Աբովյանի անվան պետական մանկավարժական համալսարանում հուրընկալվել էր քաղաքագետ, Նյու Յորքում գտնվող «Ժողովրդավարություն և համագործակցություն» ռուսական ինստիտուտի տնօրեն Անդրանիկ Միհրանյանը: Նրան բուհի ռեկտոր Ռուբեն Միրզախանյանը շնորհեց համալսարանի պատվավոր դոկտորի կոչում:
Միհրանյանը դասախոսություն կարդաց արաբական աշխարհում տեղի ունեցող իրադարձությունների վերաբերյալ և անդրադարձավ Հայաստանում և հետխորհրդային երկրներում դրանց կրկնության հավանականությանը:
Նա նշեց, որ ի տարբերություն արաբական երկրների, որտեղ իշխանությունը 30 տարի շարունակ պատկանում էր մի մարդու, Հայաստանում ոչ ոք չի ուզուրպացրել իշխանությունը. «Այս տարածքում Հայաստանը բացառիկ երկրներից է, որտեղ բռնություն չի կիրառվել, եթե իհարկե հաշվի չառնենք վերջին ընտրություններից հետո եղած դեպքերը: Բայց դա էլ էլի չնչին է, համեմատած այլ դեպքերի հետ` այստեղ համենայնդեպս տանկերով պառլամենտը չեն գնդակահարել և մեծ մաշտաբի բռնություններ չեն եղել»:
Մյուս հանգամանքը, որի պատճառով Հայաստանում չեն կարող կրկնվել արաբական հեղափոխությունների սցենարները, այն է, որ Հայաստանում չկան միջցեղային հակամարտություններ: Միհրանյանը նաև նշեց, որ Հայաստանում չկա մարդկային ռեսուրսների ավելցուկ, ինչը կար Թունիսում և Եգիպտոսում. «Ըդհակառակը, այսօր, ցավոք սրտի, Հայաստանը դեմոգրաֆիկ իմաստով ամենածանր վիճակում է գտնվում, ազգը նույնիսկ իրեն չի վերարտադրում»:
Վերջիվերջո, ըստ Միհրանյանի, Հայաստանը շրջապատված է թշնամիներով. «Հայաստանը առանց այն էլ գտնվում է երկու պատերազմների մեջ, մեկը մի քիչ ավելի տաք, մյուսը` սառը: Եվ ազգային ինստինկտը հուշում է, որ այդ իրականության մեջ ներքին պատերազմը կործանարար կարող է լինել»:
