Այն բանից հետո, երբ Վրաստանը Ռուսաստանի հետ խզեց դիվանագիտական հարաբերությունները, ջավախահայերը բազմիցս բարձրաձայնել են Ռուսաստան մեկնելու դժվարության մասին: Խնդիրը հատկապես արդիական է հիմա, երբ հայտնաբերելով, որ Վրաստանի քաղաքացիություն ունեցող անձը ունի նաև այլ երկրի քաղաքացիություն՝ զրկում են Վրաստանի քաղաքացիությունից: Ի դեպ, այս դեպքում անձը Վրաստանի տարածքում կարող է գտնվել 90 օր և ոչ ավելի:
Հայերը հիմա այլընտրանքային հնարավորություն են փնտրում՝ Ռուսաստան սեզոնային աշխատանքի մեկնելու համար, իսկ նման հնարավորություն Հայաստանը տալիս էր, քանի որ Սահմանադրության փոփոխությամբ՝ ՀՀ-ում գործում է երկքաղաքացիությունը, և արդյունքում շատ ջավախահայեր դիմեցին և ՀՀ քաղաքացիություն ստացան։ Հայկական անձնագրով Ռուսաստան մեկնելը ձեռնտու է, քանի որ Հայաստանի ու Ռուսաստանի միջև վիզային ռեժիմ չկա:
«Բազմազգ Վրաստան» քաղաքացիական նախաձեռնության ղեկավար Առնոլդ Ստեփանյանը «Առաջին լրատվական»-ի հետ զրույցում ևս բարձրաձայնեց այս խնդիրը՝ ընդգծելով, որ խնդիրը հիմա տարածված է ողջ Վրաստանում. «Քաղաքացիություն հիմա խլում են ոչ միայն ջավախահայերից, այլև ողջ Վրաստանի քաղաքացիներից՝ նույնիսկ Թբիլիսիում բնակվողներից: Ջավախքում խնդիրը տոկոսային հարաբերությամբ շատ ավելի մեծ է, որովհետև ջավախահայերը երկիրն ավելի շատ են լքում՝ մեկնելով Ռուսաստան և Հայաստան՝ աշխատելու նպատակով»,- ասաց նա:
Ստեփանյանն ընդգծեց, որ իր ունեցած տվյալներով՝ մոտավորապես 3000 մարդ Ջավախքում հիմա կանգնած է Վրաստանի քաղաքացիությունից զրկվելու վտանգի առջև: «Այդ տվյալները մենք ստացել ենք տարբեր հասարակական կազմակերպություններից, իսկ արդարադատության նախարարությունն այլ հայտարարություն է անում՝ ասելով, թե Ջավախքում ընդամենը 250 մարդ է կորցրել Վրաստանի քաղաքացիությունը, իսկ ամբողջ Վրաստանում՝ 6000 մարդ: Մեզ համար պաշտոնական տվյալները տարօրինակ են»,- ընդգծեց մեր զրուցակիցը:
Ստեփանյանը ստեղծված իրավիճակի առաջացման երկու պատճառ է տեսնում՝ ոչ պրոֆեսիոնալիզմ և էթնիկական ատելություն ազգային փոքրամասնությունների նկատմամբ. «Երկուսից որ մեկն էլ լինի՝ այն մարդիկ, ովքեր պատասխանատու են սրա համար, և ովքեր զրկում են մարդկանց քաղաքացիությունից՝ պետք է կորցնեն իրենց աշխատանքը»:
Առնոլդ Ստեփանյանը հավելեց, որ Վրաստանում երկքաղաքացիություն հիմա կարողանում են ստանալ միայն այն դեպքում, երբ Վրաստանի նախագահը բացառության կարգով տալիս է այդ հնարավորությունը, մնացած բոլոր դեպքերում մարդիկ, որոնք մինչ այս Վրաստանի քաղաքացիությունից բացի՝ ունեցել են նաև այլ երկրի քաղաքացիություն, կորցնում են Վրաստանի քաղաքացիությունը:
Ջավախքի շրջանային ժողովի պատգամավոր Ֆյոդոր Թորոսյանը «Առաջին լրատվական»-ի հետ զրույցում ընդգծեց, որ այս խնդիրը հիմա շատ արդիական է Ջավախքում. «Մարդիկ իրական խնդրի առաջ են կանգնել, Ռուսաստան մեկնելու համար ստիպված էին երկքաղաքացի լինել՝ ունենալ նաև Հայաստանի քաղաքացիություն անարգել Ռուսաստան մեկնելու համար: Դուք գիտեք, որ Վրաստանի և Ռուսաստանի միջև հիմա վիզային ռեժիմ է, և ջավախահայերը անարգել Ռուսաստան մեկնել չեն կարող: Այժմ մարդիկ պայքարում են, որ գոնե ժամանակավոր ապաստանի իրավունք ունենան: Արդարադատության նախարարն էլ հայտարարել է, որ մարդկանց խնդիրները առանձին-առանձին կքննարկվեն»,- ասաց մեր զրուցակիցը:
Թորոսյանը նշեց նաև, որ կացության կարգավիճակ ստանալու համար անգամ շատերին հիմա մերժում են. «Հիմա, ովքեր երկքաղաքացի են՝ ունեն և՛ Հայաստանի, և՛ Վրաստանի քաղաքացիություն, ավտոմատ կերպով զրկվում են Վրաստանի քաղաքացիությունից»,- ասաց մեր զրուցակիցը:
