Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում Արթուր Մկրտչյանի նախագահությամբ սկսվեց Գարիկ Օ.-ի գործի դատական քննությունը:
Ըստ մեղադրանքի՝ 48-ամյա Գարիկը «Օդնոկլասնիկի» կայքում տեսնելով «Ասյա» անունով, աղջկա հագուստով ու դիմահարդարմամբ ներկայացած ու իր սեքսուալ ծառայություններն առաջարկող Էդգար Գ.-ի լուսանկարը, նրա հետ պայմանավորվածություն է ձեռք բերել համապատասխան գումարով՝ 25 հազար դրամով, օգտվել նրա ծառայություններից:
Գարիկն այցելել է Էդգարի բնակարան:
Նրանք խմիչք են օգտագործել, ժամանակ են անցկացրել:
Այնուհետև փոխադարձ համաձայնության գալով կապկպված վիճակում սեռական հարաբերություն ունենալու վերաբերյալ՝ Գարիկը վզնոցով ու շապիկով կապել է Էդգարի ձեռքերն ու ոտքերը, ձեռքերը՝ վեր դիրքով:
Սակայն զվարճանքների տրվելու փոխարեն Գարիկը Էդգարի կոկորդը բռնելու, խեղդելու և որպես զենք օգտագործված դանակի սպառնալիքով գումար է պահանջել:
Էդգարը գումար չի տվել:
Գարիկն էլ հափշտակել է սեղանին դրված, Էդգարին պատկանող «Ֆուջիցու» տեսակի դյուրակիր համակարգիչը՝ 265 հազար դրամ արժողությամբ, և 85 հազար դրամ արժողությամբ «Նոկիա » բջջային հեռախոսը:
Հափշտակած իրերը ձեռքին՝ Գարիկը դուրս է վազել տուժողի բնակարանից: Նրան այդ վազքի պահին տեսել ու մտապահել են տուժողի հարևանները:
Գարիկը վաճառել է բջջային հեռախոսը, որը հայտնաբերվել է գործի նախաքննության ընթացքում:
Գարիկ Օ.-ին մեղադրանք է առաջադրվել ավազակային հարձակման համար՝ ՀՀ քրեական օրենսգրքի 175 հոդվածի 2-րդ մասի 4-րդ կետով: Նա գտնվում է կալանքի տակ:
Նախաքննության ժամանակ Գարիկ Օ.-ն չի ընդունել, որ ավազակային հարձակում է կատարել: Նա ասել է, որ Էդգարին այցելելով ու տեսնելով, որ նա ոչ թե «Ասյա» է, այլ Էդգար, հետ է պահանջել իր տված գումարը, իսկ հետո, երբ Էդգարը չի վերադարձրել գումարը, վերցրել է նրա նոթբուքն ու հեռախոսը և հեռացել է:
Գարիկ Օ.-ն նախկինում մի քանի անգամ դատված է եղել ու պատիժ է կրել Ռուսաստանում:
Նա ամուսնացած չէ, երեխաներ չունի:
Դատական նիստի սկզբում ամբաստանյալ Գարիկը հայտնեց, թե միջնորդելու է, որ իր գործը քննվի արագացված ընթացակարգով: Այդ դեպքում նա պետք է առաջադրված մեղադրանքում մեղավոր ճանաչի իրեն:
Գարիկ Օ.-ն հայտնեց, թե իրեն մեղավոր կճանաչի: Ըստ երևույթին՝ նա չի ուզում, որ գործի մանրամասները հնչեն դատարանում:
Որպեսզի հնարավոր լինի գործն արագացված ընթացակարգով քննել, ամբաստանյալը պետք է պաշտպան ունենա: Դատարանը որոշեց ներգրավել հանրային պաշտպանի՝ բավարարելով ամբաստանյալի այդ միջնորդությունը:
Տուժող Էդգարը դատարան չէր ներկայացել:
Բայց առաջիկա նիստին ստիպված կլինի ներկայանալ, որովհետև արագացված ընթացակարգով գործը քննելու համար կարևոր է նաև տուժողի դիրքորոշման ճշտումը:
Հաջորդ դատական նիստը տեղի կունենա փետրվարի 11-ին:
