Վրաստանի նախկին նախագահ Միխեիլ Սաակաշվիլին Կիևից CNN-ի ուղիղ եթերում խոսել է Ուկրաինայում իրադարձությունների և Ռուսաստանի նախագահ Վլադիմիր Պուտինի քաղաքականության մասին:
Սաակաշվիլիի խոսքով՝ մինչ ողջ աշխարհը կենտրոնացած էր սիրիական ճգնաժամի, ԴԱԻՇ-ի («Իրաքի և Շամի իսլամական պետություն») ահաբեկչության դեմ պայքարի վրա, Ռուսաստանն օգտագործել է պահն ու հարձակվել Ուկրաինայի վրա:
«Այն, ինչ այսօր տեղի է ունենում, մեծ աշխարհաքաղաքական դրամա է: Ամբողջ Եվրոպան և ԱՄՆ-ը պետք է Ուկրաինային օգնեն հանուն փրկության պայքարում: Մեծ բանավեճեր են ընթանում Ուկրաինային զենք մատակարարելու հետ կապված: Կարծում եմ՝ կան իրավիճակներ, երբ զենքին պետք է զենքով պատասխանել: Ուկրաինային իսկապես օգնություն է անհրաժեշտ, քանի որ մենք տեսնում ենք, թե ինչ հարվածներ է հասցնում Պուտինը: Օրի օրի աճում է խաղաղ բնակչությանշրջանում զոհերի թիվը»,- ասել է Սաակաշվիլին:
Նրա խոսքով՝ Պուտինը հրաշալի հասկանում է, որ իր երկրի տնտեսությունը փլուզման եզրին է: «Պուտինի մեջ վախ է առաջացել, որ Ամերիկան կարող է սկսել Ուկրաինային զենքի մատակարարումը: Կարծում եմ՝ այդ գործոնի ֆոնին նա պատրաստ է բանակցությունների»,- նշել է Վրաստանի նախկին նախագահը:
Ըստ նրա՝ Ուկրաինան միայն սեփական ուժերով չի կարողանա կռվել Ռուսաստանի դեմ: «Պետք է Արևմուտքին և միջազգային կազմակերպություններին հիշեցնեմ, որ ուկրաինական ճգբնաժամի կարգավորումը կախված է նրանց օգնությունից»,- հայտարարել է Սաակաշվիլին:
