Իսպանիայի, Իտալիայի, Իռլանդիայի և Մեծ Բրիտանիայի բանկերը պետք է փոքր-ինչ ավելի շատ գումար հատկացնեն «վատ» վարկերի պոտենցիալ կորուստները ծածկելու համար: Նման հայտարարություն է տարածել Moody’s վարկանիշային գործակալությունը՝ նկատի ունենալով, որ հավանաբար Եվրոպայի հարկատուները կրկին ստիպված կլինեն ճնշում գործադրել իրենց գրպանների վրա: Այս մասին հայտնում է BBC-ն:
Եվրոպական բանկերում արդեն մի քանի հարյուր միլիարդ եվրո է ներմուծվել՝ անհուսալի վարկերի հնարավոր կորուստները ծածկելու համար: Ֆինանսավորման զգալի մասը ստացվել է կառավարությունից:
«Մենք կարծում ենք, որ շատ բանկերի, հատկապես` Իսպանիայում, Իտալիայում, Իռլանդիայում, Մեծ Բրիտանիայում, անհրաժեշտ են հավելյալ պահուստների զգալի միջոցներ՝ իրենց հաշվեկշիռները լիովին կարգի բերելու համար»,- ասված է Moody’s-ի՝ 2013-ի համաշխարհային բանկային կանխատեսման մեջ:
Moody’s-ը չի հստակեցրել, թե որքան հավելյալ գումար է անհրաժեշտ բանկերին:
Գործակալության կանխատեսումը ամերիկյան բանկերի համար բացասական է՝ բնակարանային շուկայում առաջացած բարդ իրադրության պատճառով, իսկ կանխատեսումները Ասիա-խաղաղօվկիանոսյան տարածաշրջանի, Եվրոպայի և Լատինական Ամերիկայի բանկերի համար կայուն են:
