«Պարտիան դեռ ավարտված չէ»,- այսօր հայտարարեց Հայ ազգային կոնգրեսի համակարգող Լևոն Զուրաբյանը՝ պատասխանելով հարցին, թե ինչո՞ւ մինչև հիմա երկրում տեղի չի ունեցել իշխանափոխություն: Ըստ Զուրաբյանի՝ ժամանակին Հիտլերն էլ էր հայտարարում, թե ինքը հեռացողը չի, այսօր էլ Քադաֆին է նույնը հայտարարում: «Համառությունը մի որոշ աստիճանից արդեն դառնում է հանցագործություն»,- ասաց նա: Լրագրողներից մեկի դիտարկմանն ի պատասխան, թե՝ ՀՀԿ փոխնախագահը հայտարարում էր, որ իրենք Քադաֆին չեն, ասաց. «Շատ ավելի լավ, ուրեմն, թող հրաժարական տան»:
Լ. Զուրաբյանը փաստեց, որ իշխանությունները գյուղատնտեսությանը որոշեցին ուշադրություն դարձնել այն բանից հետո, երբ Հայ ազգային կոնգրեսը սկսեց այցելել գյուղեր: «Դա պատասխան էր մեր ակտիվությանը: Իրենք էլ հասկացան, որ ստեղծվել է լուրջ անջրպետ»,- ասաց Զուրաբյանը: Վերջինս խոսեց նաև ընդդիմադիր դաշտի միասնականության ու ընդդիմադիր ուժերի՝ իրար չսիրելու մասին: Զուրաբյանի կարծիքով, այսօր ընդդիմադիր դաշտի 95 տոկոսը միասնական է: «Նույնիսկ Հիսուս Քրիստոսը չէր կարող ապահովել 100 տոկոս ունիվերսալ սեր»,- հայտարարեց նա:
