Երեկ Վանաձորի «Պրոմեթեյ-Քիմպրոմ» ՓԲԸ-ի ամոնիակի արտադրամասում տեղի ունեցած պայթյունի դեպքի առթիվ Լոռու մարզի քննչական բաժնում հարուցվել է քրեական գործ Քր. օր.-ի 231-րդ հոդվածի 2-րդ մասով` պայթյունավտանգ օբյեկտներում անվտանգության կանոնները խախտելը, որն անզգուշությամբ առաջացրել է մարդու մահ: Հիշեցնենք, որ երեկ 9.40-ի սահմաններում տեղի ունեցած պայթյունի հետևանքով նշված արտադրամասի երիտասարդ ապարատավար Դավիթ Ասատրյանը տեղում մահացել է:
Ինչպես «Առաջին լրատվական»-ին հայտնեց Վանաձորի շտապբուժօգնության կայանի պետ Սամվել Սահակյանը, դեպքի վայր մեկնած բուժանձնակազմը նրան հայտնաբերել է այնպիսի վիճակում, որ չի կարողացել մոտենալ: Նրանից հեռու ընկած է եղել անդամահատված ձեռքը: Մյուս տուժողը` նույն արտադրամասի աշխատակից Արթուր Համբարյանը, ձեռքի ֆալանգի վնասվածք է ստացել: Դեպքի հետ կապված` արտադրամասի պետ Գառնիկ Թոթոլյանի ինքնազգացողությունը նույնպես վատացել է: Նրանց տեղում բուժօգնություն է ցուցաբերվել:
«Առաջին լրատվական»-ի հետ զրույցում «Պրոմեթեյ-Քիմպրոմ»-ի գազի արտադրության պետ Վիլիկ Ամիրխանյանը, ճշգրտելով արդեն տարածված պաշտոնական տեղեկատվությունը, թե պատահարը գազի տարայի պայթյունից է եղել, ասաց. «Պայթողը եղել է ցածր ճնշման ապարատ: Դա ազոտաջրածնային խառնուրդ է, որն ստացվում է մեթանի կոնվերտորում»: Նա փոխանցեց, որ գազի արտադրությունը դեռ սկսված չէր, գործարկման աշխատանքներ էին տարվում: Իսկ գործարկման փուլում բացառված չեն նման դեպքերը: «15 տարի չաշխատող գործարան գումարած մարդկային գործոնը»,- որպես պայթյունի պատճառ սա նշեց արտադրամասի պետը` չպարզաբանելով «մարդկային գործոն» արտահայտությունը: Ապա ավելացրեց. «Ուրիշ ապարատից բարձր ճնշում է մտել, ինքը ցածր ճնշման էր, միանգամից ճնշումը մտել է ու տրաքել»:
Պայթյունից զոհված երիտասարդը 22 տարեկան էր, 2 ամիս էր` ինչ, պետի խոսքերով՝ հանձնաժողովով քննություն անցած, աշխատում էր գործարանում: Պետից խնդրեցինք նրա բնակության հասցեն կամ այլ կոնտակտային տվյալներ: Մերժեց` ասելով, որ չունի և չի կարող տալ: Նկատեցինք, որ իր աշխատակիցն է եղել: «Դուք ձեր բոլոր աշխատակիցների հեռախոսահամարները գիտե՞ք»,- եզրափակեց արտադրության պետը:
Լուսանկարը՝ Գագիկ Շամշյանի