Ռուսաստանը մեծացնում է իր ռազմական խմբի և դաշնակիցների զինված ուժերի մարտունակությունը Հարավային Կովկասում: Բացի Հարավային Օսիայի և Աբխազիայի բազաներից, որոնց հետ Ռուսաստանն արդեն ունի ընդհանուր սահման, հատուկ ուշադրություն է հատկացվում Հայաստանի Հանրապետության անկլավ ռուսական խմբավորմանը,- հաղորդում է «Նեզավիսիմայա» թերթը:
Թերթի տվյալներով՝ Ռուսաստանի կառավարությունը նախագահ Վլադիմիր Պուտինի հրամանով, արագացված ռեժիմով պայմանագիր է պատրաստում Հայաստանի հետ ռազմա-տեխնիկական համագործակցության զարգացման շուրջ: Իսկ ՌԴ պաշտպանության նախարարությունը մինչև 2013 թ. հունվարի 15-ը կատարել է Գյումրիում տեղակայված ՌԴ 102-րդ ռազմական բազայի պայմանական զինծառայողների հավաքագրման ծրագիրը: Կես տարվա ընթացքում նրանց թիվը մեծացել է երկու անգամ: Ընդ որում, բազայի հաստիքային թվաքանակը չի փոխվել, այն կազմում է շուրջ 5000 զինծառայող:
Թերթի փոխանցմամբ՝ ռազմական փորձագետները կարծում են, որ 102-րդ բազայի արագացված տեղափոխումը պրոֆեսիոնալ հիմքի կապված է Հայաստանում երկրաքաղաքական իրավիճակի կտրուկ փոփոխությամբ, ինչը վտանգ է ներկայացնում նաև Ռուսաստանի և նրա դաշնակիցների համար: Այդ սցենարները կապված են Լեռնային Ղարաբաղի հակամարտության շուրջ Հայաստանի դեմ Ադրբեջանի հավանական ռազամական գործողություններ սկսելու և Իրանի դեմ Իսրայելի հավանական ռազմական ակցիայի հետ:
«Արդյո՞ք ռուսական խմբավորումը կմասնակցի հավանական ռազմական գործողություններին Հայաստանի դեմ ագրեսիայի դեպքում՝ քաղաքական հարց է: Սակայն միանշանակ պարզ է այն փաստը, որ մեր ռազմական բազան այստեղ պետք է մարտունակ լինի, այդ թվում՝ խաղաղապահ գործողությունների համար»,-կարծում է ռազմական փորձագետ, գեներալ-լեյտենանտ Յուրի Նետկաչևը:
Իբրև ապացույց իր վարկածի՝ գեներալը մեջբերում է Ադրբեջանի նախագահ Իլհամ Ալիևի՝ վերջերս հնչեցրած հայտարարությունը, որի համաձայն՝ քանի դեռ շարունակվում է Լեռնային Ղարաբաղի շուրջ հակամարտությունը, Բաքուն պատրաստ է բացի դիվանագիտական, տնտեսական միջոցներից Երևանի վրա ազդել նաև ռազմական միջոցներով: Նետկաչևի կարծիքով՝ դրանք դատարկ խոսքեր չեն, քանի որ Ալիևի հայտարարության համաձայն՝ «Ադրբեջանի ռազմական բյուջեն կազմում է 3.7 միլիարդ դոլար, ինչը էականորեն գերազանցում է Հայաստանի ընդհանուր բյուջեին»:
Թերթը, վկայակոչելով ՌԴ ՊՆ-ում իր աղբյուրներին, հաղորդում է, որ Ռուսաստանի և Հայաստանի միջև պայմանագրի նախագծի համաձայն՝ կողմերը պետք է ստեղծեն համատեղ պաշտպանական ձեռնարկություններ և արտակարգ իրավիճակի հարցերով սահմանապահների և մասնագետների նախապատրաստական կենտրոններ: Հայաստանի պաշտպանական արդյունաբերությունը Ռուսաստանի օգնությամբ պետք է լավացնի որոշ զինապաշարների արտադրությունը, ստեղծի համատեղ վերանորոգման բազա ոչ միայն ցամաքային ուժերի, այլ նաև ռազմա-օդային և ՀՀՊ ուժերի զինամթերքի համար: Համանման արձանագրություն ստորագրվել է 2012 թ. փետրվարի 9-ին:
Մեկնաբանելով Հայաստանի հետ ռազմա-տեխնիկական զարգացման մասին պայմանագրի ստորագրման հավանականությունը՝ ռազմավարության և տեխնոլոգիայի վերլուծության կենտրոնի տնօրեն Ռուսլան Պուխովը հայտարարել է, որ մինչև վերջին ժամանակներս ձևավորվել էր տարօրինակ իրավիճակ:
«Մեր դաշնակիցը Հայաստանն էր, իսկ մենք զենք էինք մատակարարում Ադրբեջանին: Այժմ ուզում եմ հուսալ, որ, պայմանագրի շնորհիվ, այդ սխալը կուղղվի: Պուխովը կարծում է, որ Ադրբեջանը ոչ միշտ է բարեկամական քաղաքականություն վարում Ռուսաստանի հանդեպ:
Նա նշել է, որ Ռուսաստանը, ակտիվացնելով հարաբերությունները Հայաստանի հետ, պաշտպանում է իր շահերը Հարավային Կովկասում:
