Սոցիալական ապահովության պետական ծառայության նախկին ղեկավար Վազգեն Խաչիկյանը շարունակում է մնալ հիվանդանոցում: Նրա անալիզների պատասխանները դեռ հայտնի չեն, ամենայն հավանականությամբ, պարզ կլինի օրվա ընթացքում: Այս մասին «Առաջին լրատվական»-ին տեղեկացրեց Խաչիկյանի եղբայրը՝ Ախթալայի քաղաքապետ Հայկազ Խաչիկյանը:
Հիշեցնենք, որ հինգշաբթի օրը Խաչիկյանին տեղափոխել էին հիվանդանոց, և, ըստ շրջանառվող լուրերի, նա գլխուղեղի արյան շրջանառության հետ կապված խնդիրներ է ունեցել: Մեկ այլ լուրի համաձայն, նա ռեստորանում թունավորվել էր: Խաչիկյանի կինը հաստատել էր ամուսնու՝ ռեստորանում գտնվելու փաստը, բայց նշել, թե նա ոչինչ չի կերել:
Ուշագրավ է նաև փաստը, որ Խաչիկյանի ղեկավարած սոցիալական ապահովության պետական ծառայությունում հայտնաբերվել էին հսկայական չարաշահումներ, ընդ որում, ստուգվել էր 52 տարածքային կենտրոնից դեռ 14-ը: Այդ ամենի արդյունքում Խաչիկյանը Սերժ Սարգսյանի հետ հանդիպումից հետո հրաժարական էր ներկայացրել:
