«Նոր ժամանակներ» կուսակցության նախագահ Արամ Կարապետյանի կարծիքով, հեղափոխությունները հետաքրքիր են հենց նրանով, որ պայթում են աննախադեպ: «Եթե իշխանությունը իմանա, որ արտահերթ ընտրությունները հանգեցնելու են նրան, որ ամեն ինչ փոխվելու է, ինչու՞ պիտի անցկացնի արտահերթ ընտրություններ»,- հարցրեց Արամ Կարապետյանը: Միաժամանակ նա նշեց, որ եթե իշխանությունն անցկացնի արտահերթ ընտրություններ, դա նշանակում է, որ կընդունի իր պարտությունը: Անդրադառնալով 2008 թ. ստեղծված նախամարտիմեկյան իրավիճակին` Արամ Կարապետյանը նշեց, որ այդ ժամանակ շատ կարեւոր գործ արվեց: Նա համամիտ չէ այն մարդկանց տեսակետին, որ մարտիմեկյան իրադարձություններից հետո ներքաղաքական կյանքում ամեն ինչ սառեցվեց: Ըստ ՆԺԿ նախագահի` կարող են լինել նաեւ անկումային փուլեր, սակայն դա չի նշանակում, որ այդ անկումը վերջնական է: Նա հիշեց, որ 2004 թ. ապրիլի 12-ից մինչեւ 2007 թ. անկման շրջան էր, որից հետո հասարակությունը ակտիվացավ: Իսկ 2008 թ. արդեն հասարակությունը շատ մոտ էր հաղթանակին: Այսքանից հետո Արամ Կարապետյանը եկել է այն համոզման, որ Հայաստանում հաղթել հնարավոր է կայծակնային գործողություններով, եւ այդ գործողությունները երեքից հինգ օր պետք է տեւեն: