Արման Մելիքյանը ԿԸՀ նախագահին հորդորում է հրապարկել հանրապետությունից բացակայող քաղաքացիների ցուցակը: Այսօր այս մասին ասաց ՀՀ նախագահի թեկնածու, ԼՂ նախկին արտգործնախարար Արման Մելիքյանը:
ՀՀ նախագահի թեկնածուն տեղեկացրեց, որ հրաժարվում են իշխանություններին որևէ բան ապացուցելու սովորույթից, այլ խնդիրն են դնում ապահովել ընտրությունների իրավաչափությունը: Արման Մելիքյանի խոսքերով՝ դրա համար յուրօրինակ մեխանիզմ է մշակվել, ընտրություններից առաջ է իրավաչափությունը հայտնի դառնալու:
Լրագրողների ներկայությամբ Արման Մելիքյաը ստորագրեց մի նամակ, որով ԿԸՀ նախագահին առաջարկում է աջակցել այն բանին, որ հրապարակվեն ՀՀ-ից հեռացած քաղաքացիների տվյալները, նրանց տվյալները, ովքեր հրաժարվել են քաղաքացիությունից: ՀՀ նախագահ թեկնածուն ասաց, որ սա առաջին քայլն է:
Հաջորդ քայլը, ըստ նրա, այն է, որ արդեն իսկ գործարկված է իր ֆեյսբուքյան էջը և բլոգը, որտեղ քաղաքացիները հնարավորություն կունենան ասել, որ չեն լինելու Հայաստանում ընտրությունների օրը կամ չեն մասնակցելու ընտրություններին:
«Այս մեխանիզմով պարզ կդառնա՝ որքան մարդ է մասնակցում ընտրություններին: Պաշտոնական տվյալները որքանով են իրավացի: Այլևս ոչ թե հասարակությունը պետք է փորձի ապացուցել իր արդարացիությունը, այլ իշխանությունները պետք է ապացուցեն իրենց պատրաստակամությունը՝ հետևելու օրենքի տառին:
Եթե հրաժարվեն հրապարակել նման տվյալներ, մենք կիջեցնենք նրանց ռեյտինգը: Մենք համարում ենք, որ 35-40% տոկոս ընտրողներ Հայաստանում չեն: Եթե տեղեկություններ ստանանք, որ զինվորներին պարտադրում են քվեարկել Սերժ Սարգսյանի օգտին, ապա մենք հարյուր հազար քվե կհանենք Սերժ Սարգսյանի ձայներից: Այս անգամ մենք կունենանք վստահված անձինք:
Ես հրավիրում եմ համագործակցության արտախորհրդարանական բոլոր ուժերին, որոնք հնարավորություն կունենան իմ լիազորված անձի վկայականով լինել ընտրատեղամասերում: Ցանկացած բռնության, կեղծիքի դեպքում այդ մարդիկ իրենց որոշմամբ կլքեն ընտրատեղամասերը։ Մեր խնդիրը կլինի այն, որ եթե այդ մարդը տեղում հայտնաբերել է ընտրությունների ընթացքի վրա ազդող երևույթ, մենք դա արձանագրենք: Սա մեր մարտավարության որոշ դրվագներն են»,- մանրամասնեց Արման Մելիքյանը՝ շարունակելով, որ մարտավարության ամբողջական տեքստը կհրապարակեն շաբաթվա ընթացքում:
Անդրադառնալով ընտրագրավին՝ նա ասաց, որ նման գումարներ չունի, ունի համախոհներ, որոնց բանակը նախորդ ընտրությունների համեմատությամբ շատացել է, դրա համար այս հարցը լուծել են:
