Այսօր, ժամը 17-18.00-ի սահմաններում կալանավոր Շալիկո Մանուչարյանը, «Արթիկ» ՔԿՀ-ից տեղափոխվելով «Վանաձոր» ՔԿՀ, որպես Լոռու մարզի դատախազության և ոստիկանության ապօրինությունների դեմ բողոքի նշան` կարել է բերանն ու անժամկետ հացադուլ հայտարարել:
Շալիկո Մանուչարյանը կալանքի տակ է մայիսի 30-ից: Նրան մեղադրանք է առաջադրված Քր. օր.-ի 112 և 235-րդ հոդվածներով: Մեղսագրվող արարքներում նա իրեն մեղավոր չի ճանաչում և պնդում է, որ իրավապահների կողմից ապօրինաբար է պահվում կալանքի տակ:
Ավելի վաղ կալանավորի ծնողները դիմում-բողոք են հղել լրատվամիջոցներին, իրավապաշտպան կազմակերպություններին և միջազգային կառույցներին` խնդրելով աջակցել որդու խախտված իրավունքների պաշտպանության գործում և թույլ չտալ, որ անմեղ մարդը դատապարտվի չկատարած արարքի համար միայն այն պատճառով, որ այդպես է ցանկանում դատախազը, որպեսզի ոստիկանների վրա չբացահայտված գործ չմնա:
«2010 թ. նոյեմբերի 2-ին Վանաձոր քաղաքի Տիգրան Մեծ պողոտայում ցերեկը ինչ-որ անձ կրակել է Վանաձոր քաղաքի բնակիչ Արսեն Փերիխանյանի վրա և դիմել փախուստի: Այդ դեպքի մասին մենք իմացել ենք նույն օրը, երբ ոստիկանները լցվել էին մեր տուն և տղայիս՝ Շալիկո Սերգեյի Մանուչարյանին էին հարցնում: Մեր որդին այդ դեպքի հետ ոչ մի կապ չունի:
2012 թ. մայիսի 30-ին ոստիկանները ներխուժել են մեր տուն և մեր որդուն տարել են Վանաձորի ոստիկանություն՝ մեզ ասելով, որ նրա նկատմամբ դատարանի սանկցիա կա: Ներկայումս մեր տղան անհիմն կալանավորված է և ապօրինաբար արդեն 7,5 ամիս գտնվում է կալանավայրում: Նրան մեղադրում են իր չկատարած արարքի մեջ: Այն, որ իմ որդին այդ դեպքի հետ ոչ մի կապ չունի, գիտեն բոլորը, այդ թվում՝ Լոռու և Շիրակի մարզի դատախազները և քննիչներն ու ոստիկանները:
Ի դեպ, պետք է նշեմ, որ տղայիս սկզբից պահում էին Վանաձորի քննչական մեկուսարանում, այնուհետև տեղափոխեցին Արթիկի բերդ, մոտ 4 ամիս անց նորից տեղափոխում են Վանաձորի մեկուսարան: Չեն կարողանում հաստատել որդուս գլխին «սարքած» «մեղադրանքը», դրա համար կարծես թե Շիրակի և Լոռու մարզերի դատախազները և քննիչները մտել են մրցավազքի մեջ. իրար, այսպես ասած, «պաս» են տալիս, չեն կարողանում կոնկրետացնել, թե դատախազներից որ մեկը պետք է հաստատի անմեղ մարդու վրա բարդած մեղքը:
Վանաձոր քաղաքում տարբեր մարդկանցից լսել ենք, որ իրավապահները, հստակ ցուցում ունենալով Շալիկո Մանուչարյանի նկատմամբ թշնամաբար տրամադրված Լոռու մարզի դատախազից՝ իրենցից կախման մեջ գտնվող մարդկանց կանչել և հարցաքննել են՝ իբրև ականատես վկաներ: Այդ մարդկանցից, օրինակ, ոմն Սուրենին ճանաչում է գրեթե ամբողջ Վանաձոր քաղաքը, ճանաչում է որպես նախկին ՕԲԽՍՍ-ի հաստիքային գործակալի, ապա նաև` ոստիկանների գործակալի, ով մշտապես ընթերակայի կարգավիճակ ունի,և բազում մարդիկ նրա, վկայություններով դատապարտվել են: Իսկ մեկ այլ, այսպես ասած, վկան հանրաճանաչ ալկոհոլիկ և մուրացկան է:
Հիշեցնեմ, որ դեպքը տեղի է ունեցել Վանաձորի կենտրոնական, մարդաշատ փողոցի վրա, ամենաաշխույժ սրճարանի մոտ, օրվա ցերեկային ժամին, և ինչպես է ստացվել, որ բացի այդ «վկաներից, որևէ այլ՝ ոստիկաններից կախման մեջ չգտնվող անձ չի տեսել, որ մեր տղան է «հանցագործը»,-գրել են կալանավոր Շալիկո Մանուչարյանի ծնողներ Սերգեյ Մանուչարյանն ու Ռուզաննա Վարդանյանը:
