Փոփ երաժշտության երիտասարդ կատարողների «Նոր ալիք» մրցույթը, որը ամեն տարի տեղի է ունենում Յուրմալայում, իրեն սպառել է՝ կարծում է դրա հիմնադիրներից կոմպոզիտոր Ռայմոնդ Պաուլսը:
Ինչպես հայտնում է RIA Novosti-ն, այս մասին կոմպոզիտորը ավելի վաղ հայտարարել էր լրագրողներին ու ասել, որ այլևս չի մասնակցելու մրցույթի կազմակերպմանը: Նա մտադիր է հրաժարվել մրցույթում հանդես գալ նաև որպես ժյուրիի անդամ:
«Միջոցառումն իրեն սպառել է: Երիտասարդ կատարողների մրցույթը անմիջականորեն արդեն երկրորդ-երրորդ պլան է մղվել: Առաջին պլանում են լրագրողների զանգերը, որոնք հարցնում են՝ գալո՞ւ է Աբրամովիչը, թե՞ ոչ, ու եթե գալու է՝ ի՞նչ զբոսանավով է գալու: Կարծես ես ուղղակի կապ ունեմ օլիգարխի հետ ու հասկանում եմ այդ զբոսանավերից: Այս ամբողջ շոու-բիզնեսը կատարյալ մրցավազք է ինչ-որ փողերի հետևից»,- ասել է Պաուլսը The Telegraph թերթի կայքէջին տված հարցազրույցում:
Մրցույթի կազմակերպման գաղափարը Իգոր Կրուտոյն ու Ռայմոնդ Պաուլսը հղացել էին 2002 թվականին, որի նպատակը նոր աստղերի հայտնաբերումն էր:
