Ադրբեջանական SalamNews.org կայքի փոխանցմամբ, «Ղարաբաղի ազատագրման» կազմակերպության ղեկավար Ակիֆ Նագին մեկնաբանել է հայկական լրատվամիջոցների տարածած այն տեղեկատվությունը, որ ՀՀ նախագահ Սերժ Սարգսյանը լինելու է Երևան-Ստեփանակերտ ավիաթռիչքի առաջին ուղևորը.
«Դա Հայաստանի հերթական «մարտահրավերն» է ուղղված ոչ միայն Ադրբեջանի, այլև` միջազգային հանրության դեմ: Միջազգային կոնվենցիաների համաձայն, Ադրբեջանը «բոլոր իրավունքներն» ունի կործանելու «իր օդային սահմանը խախտած» ինքնաթիռը` անկախ նրանից, թե ով է դրանում գտնվում:
Կամ էլ մենք կարող ենք այդ ինքնաթիռին հարկադիր վայրէջք պարտադրել Բաքվում, և եթե ուղևորների թվում լինի նաև Հայաստանի նախագահը, ապա մեր իրավապահ մարմինները նրան կձերբակալեն որպես «ռազմական հանցագործի»:
Դրանով Հայաստանը ցանկանում է միջազգային հանրության մեջ սերմանել այն գաղափարը, որ իրականում այդ տարածքները պատկանում են հենց իրեն:
Ցավոք, մենք մի փոքր ուշացել ենք այս հարցում: Ադրբեջանը պետք է սկսեր ակտիվ ջանքեր գործադրել հենց այն ժամանակ, երբ հայերը դեռ նոր էին ձեռնամուխ եղել Ստեփանակերտի օդանավակայանի կառուցմանը: Եթե այսօր մենք կտրուկ դեմ հանդես չգանք դրան, ապա հետագայում մեզ կսկսեն պարտադրել մի շարք զիջումներ:
Բաքվում ԱՄՆ դեսպան Մեթյու Բրայզան հայտարարել է, որ մինչև օդանավակայանի բացումը Հայաստանը և Ադրբեջանը պետք է լուծեն թռիչքների անվտանգության հարցը: Դրանով նրանք (ԵԱՀԿ Մինսկի խմբի համանախագահ երկրները) մեզ փորձում են համակերպել ստեղծված իրավիճակի հետ»:
Ակիֆ Նագիին պետք է հիշեցնել, որ, բացի վերոնշյալից, Բրայզան հայտարարել էր, որ իր երկիրն անընդունելի է համարում քաղաքացիական ինքնաթիռների դեմ ուժ կիրառել սպառնացող Ադրբեջանի վարքը:
