Ֆրանսիայում տաքսու հազարավոր վարորդներ հինգշաբթի օրը գործադուլ են արել՝ արգելափակելով մայրուղիների երթևեկությունը և դժվարացնելով կայարանների և օդանավակայանների աշխատանքները։ Այս մասին տեղեկացնում են տեղական ԶԼՄ-ները:
Ֆրանսիացի տաքսիստների բողոքն է առաջացրել մոտո–տաքսիների և տեղափոխման ծառայություն առաջարկող տուրիստական ընկերությունների հետ «անբարեխիղճ մրցակցությունը»: Վերջիններս չեն վճարում այն հարկերը, որոնք վճարում են սովորական տաքսիների վարորդները: Բացի դրանից, տաքսու վարորդները բողոքում են կառավարության՝ գների իջեցման նպատակով հիվանդներին տեղափոխելու տենդերներն օրինականացնելու մտադրության դեմ: Նախկինում հասարակական ապահովագրության մարմիններն իրենք էին որոշում, թե որ տեղափոխողին ընտրեն, և հատուկ սարքավորումներով հագեցված տաքսիներին բաժին էր ընկում հիվանդների տեղափոխման 31 %-ը, իսկ շտապօգնության մեքենաներին՝ 37 %-ը:
Արհմիությունների տվյալներով՝ 600-800 տաքսիներ հինգշաբթի առավոտյան հավաքվել են փարիզյան «Ռուասսի» օդանավակայանում: Ժամը ութին նրանք խխունջի արագությամբ շարժվել են մայրաքաղաքի ուղղությամբ՝ ժամանակ առ ժամանակ կանգ առնելով և արգելափակելով փողոցները: Այդպիսի ակցիա է կազմակերպվել նաև «Օռլի» օդանավակայանից: Բացի դրանից, տաքսու վարորդները արգելափակել են իրենց այն գործընկերների ճանապարհները, ովքեր չեն կարողացել մասնակցել գործադուլին՝ թույլ չտալով նրանց հաճախորդներ վերցնել: Նրանց վրա ձու և ալյուր են նետել: Այդպիսի բախտի են արժանացել նաև մրցակիցների ավտոմեքենաները, որոշ դեպքերում ոստիկանությունը ստիպված է եղել միջամտել:
Նմանատիպ ակցիաներ են տեղի ունեցել Ֆրանսիայի այլ քաղաքներում՝ Մարսելում, Նանտեում, Լիոնում և Նիցցայում:
