Ադրբեջանական Salamnews.org կայքի փոխանցմամբ, Ադրբեջանի Միլլի մեջլիսի (խորհրդարան) պատգամավոր, «Քաղաքացիական համերաշխություն» կուսակցության նախագահ Սաբիր Ռուստամխանլըն հայտարարել է, որ Ադրբեջանում պետք է ստեղծել «ցեղասպանության» հանրապետական մեծ թանգարան, ուր կտեղակայվեն ադրբեջանական ժողովրդի պատմության բոլոր աղետալի էջերն արտացոլող նյութերը.
«Այդ թանգարանում պետք է հավաքել ադրբեջանական ժողովրդի դեմ իրականացված «հրեշավոր հանցագործությունների» ողջ մասշտաբն արտացոլող արխիվային նյութերը, պատմական փաստաթղթերը:
Նմանատիպ թանգարանների ես ականատես եմ եղել, օրինակ, Ալժիրում ու Ուզբեկստանում: Ուզբեկական թանգարանում պահպանվում են դեռևս Պյոտր 1-ի ժամանակ ուզբեկ ժողովրդի դեմ գործած հանցագործությունների մասին պատմող փաստաթղթերը:
Մինչդեռ առավել շատ տուժած Ադրբեջանում գոյություն չունի այդպիսի թանգարան: Արդեն 15 տարի է, ինչ խոսվում է դրա մասին, սակայն կոնկրետ արդյունք չկա: Կարծում եմ, որ դրանում առկա է քողարկված հայկական հետք: Չէ՞ որ Ադրբեջանում դեռևս բնակվում են 30.000 հայեր»:
Հիշեցնենք, որ Ադրբեջանում մարտի 31-ը ճանաչված է որպես 1918 թվականին հայերի կողմից իրականացված «ցեղասպանության» օր:
