Ճապոնական NHK և ամերիկյան Discovery Channel հեռուստաալիքների նկարահանող խումբը առաջին անգամ կարողացել է բնական միջավայրում՝ օվկիանոսի խորքում, նկարահանել հսկայական կաղամար: Այս մասին հաղորդում է RIA Novosti-ն՝ հղում կատարելով ճապոնական ԶԼՄ-ներին:
Խաղաղ օվկիանոսի ամենախորհրդավոր բնակիչներից մեկի բնակության վայրի որոնման արշավախումբը ճապոնաամերիկյան խմբին հասցրել է Տիտիձիմա կղզիների մոտ, որը տեղակայված է Տոկիոյից 1000 կմ հեռավորության վրա:
Արշավախմբին աջակցել է նաև Ճապոնիայի գիտության ու շրջակա միջավայրի ազգային թանգարանը:
Բարձրարժեք լուսանկարներն արվել են 630 մ խորության վրա` բարձր զգայունության տեսասարքերի միջոցով:
Ինչպես նկատում են փորձագետները, հայտնաբերված կաղամարն ունի մոտ 3 մետր երկարություն ու չի ունեցել 2 ամենաերկար շոշափուկները:
Ավելի կարճ շոշափուկներով կաղամարը բռնել է իր ավարը՝ մեկ այլ կաղամարի, որին խումբը օգտագործել է որպես խայծ:
Բացի այդ՝ կադրերում երևում է նաև կենդանու հսկայական աչքը:
Հսկայական կաղամարի երկարությունը կարող է հասնել մինչև 18 մետրի: Ենթադրվում է, որ կենդանին առասպելական հրեշների «նախահայրն է»:
