Քուվեյթում բլոգերը դատարանի կողմից 2 տարվա ազատազրկման է դատապարտվել թվիթերյան գրառման համար, որը համարվել է երկրի ղեկավարի հասցեին հնչած վիրավորանք։
Դատավճռի համաձայն՝ Ռաշիդ Սալեհ Անզիի հոկտեմբերյան «թվիթը», որը կարդացել են 5,7 հազար օգտատերեր, «վնաս է հասցրել էմիրի իրավունքներին և իշխանությանը»: Անզին մտադիր է բողոքարկել դատավճիռը:
Վերջին շրջանում Քուվեյթի իշխանությունները խիստ են արձագանքում համացանցում հնչող քննադատություններին:
Անցյալ տարվա հունիսին մի տղամարդ դատապարտվել էր 10 տարվա ազատազրկման այն բանից հետո, երբ որոշվել էր, որ սոցիալական ցանցերից մեկում նրա տեղադրած հաղորդագրությունը վիրավորանք է պարունակում Մուհամմեդ մարգարեի, ինչպես նաև Սաուդյան Արաբիայի և Բահրեյնի առաջնորդների հասցեին, և որ այն սպառնալիքի տակ է դրել երկրի անվտանգությունը:
Երկու ամիս անց, իրավապաշտպանների տվյալներով, Մեշալ Աս-Սաբահի ընտանիքի անդամներից մեկը ձերբակալվել է «Թվիթեր»-ում արված գրառման համար, որտեղ իշխանություններին մեղադրում էր կոռուպցիայի մեջ և քաղաքական բարեփոխումների կոչ էր անում: