Վրաստանի պաշտպանության արդեն նախկին նախարար Իրակլի Ալասանիան երկրի բոլոր արևմտամետ ուժերին կոչ է արել համախմբվել: Նա հայտարարել է, որ Ռուսաստանը հստակ ծրագիր ունի՝ ավերելու այն պետական ինստիտուտները, որոնք ապահովում են Վրաստանի ինտեգրումը Եվրոպա և ՆԱՏՕ: Այս մասին գրում է «Գրուզիա Օնլայն»-ը:
«Ռուսասկան ծրագիրը նախատեսում է ստեղծել վրացական Յանուկովիչ, իսկ յանուկովիչներ Վրաստանում շատ են: Մենք գործընկերներ ենք փնտրում բոլոր նրանց շրջանում, ովքեր իրենց արևմտամետ ուժ են համարում: Ես վստահում եմ կոալիցիայի իմ բոլոր գործընկերներին և հիմքեր չեմ տեսնում՝ համարելու, թե իրադարձությունները կընթանան ռուսական սցենարով: Համենայնդեպս, դրա հույսն ունեմ: Իմ միակ պայմանը երկրի եվրաատլանտյան ընտրության հաստատումն է»,- հայտարարել է Ալասանիան:
Նրա խոսքերով՝ Վրաստանի կյանքում նոր փուլ է սկսվել՝ «երբ մենք բոլորս պետք է պաշտպանենք այն արժեքները, որոնց համար Վրաստանը պայքարել է անցած 20 տարիներին»:
