Սիրիայի հակահրթիռային պաշտպանության մի շարք օբյեկտներում ռուս մասնագետներ են աշխատում: Այս մասին հաղորդում է բրիտանական The Guardian թերթը՝ վկայակոչելով իր տեղեկացված աղբյուրները:
Այդ տվյալների համաձայն՝ ռուսներն աշխատում են ոչ բոլոր մարտկոցների, այլ միայն ժամանակակից և վերջերս երկիր ներմուծվածների վրա: Պարբերականի տեղեկության համաձայն՝ այս համալիրների մի մասը Սիրիա է բերվել երկրում խռովություն սկսվելուց հետո:
Ինչպես նշում է The Guardian-ը, Սիրիայի ՀՀՊ օբյեկտներում ռուս սպաների գտնվելը կարող է էապես բարդացնել ՆԱՏՕ-ի հավանական գործողությունները ինչպես ռազմական, այնպես էլ քաղաքական տեսանկյունից: Ռուսներն ավելի լավ են նախապատրաստված, քան սիրիացիրները, այդ պատճառով կարող են մեծ վնաս հասցնել օտարերկրյա օդուժին, իսկ նրանց հնարավոր մահը սպառնում է «անկանխատեսելի աշխարհաքաղաքական հետևանքներով»:
Թերթի կողմից հարցված փորձագետները միակարծիք են այն հարցում, որ սիրիական ՀՀՊ-ն շատ ավելի լավն է լիբիականից: Այն բաղկացած է երկու դիվիզիաներից, որոնք իրենց տրամադրության տակ ունեն ավելի քան 130 հրթիռային մարտկոց և հազարավոր զենիթային զենք: Երկու դիվիզիաների ընդհանուր թիվը կազմում է ավելի քան 50 հազար մարդ:
Բացի այդ, վերջին տարիների ընթացքում Սիրիայի ՀՀՊ համակարգը ենթարկվել է լուրջ մոդեռնիզացման, ինչն ավելի է բարդացնում այն հաղթահարելու հարցը:
Հիշեցնենք, որ Ռուսաստանի պաշտոնական ներկայացուցիչներն ավելի վաղ հերքում էին Սիրիայում իրենց ռազմական ներկայության մասին տեղեկատվությունը՝ հայտարարելով, որ ներկայում ռազմական համագորակցությունն այդ երկրի հետ «խիստ սահմանափակ է»: