Չեխիայի նախագահական արշավի երկու ֆավորիտները՝ նախկին վարչապետեր Միլոշ Զեմանն ու Յան Ֆիշերը, նախկինի պես ունեն պետության ղեկավարի ընտրությունների երկրորդ փուլ անցնելու առավել մեծ շանսեր: Այս մասին հայտնում է չեխական Czech News Agency-ն (CTK)՝ հղում անելով հետազոտական Median կենտրոնի վերջին տվյալներին:
Չեխիայում նախագահական առաջին համաժողովրդական ընտրությունները կանցկացվեն 2013 թվականին հունվարի 11-12-ը:
Median-ի հարցումների համաձայն՝ ընտրությունների առաջին փուլում Զեմանին պատրաստ է իր ձայնը տալ ընտրողների 26.5 տոկոսը: Երկրորդ տեղում Ֆիշերն է (26%): Երրորդ տեղում վարչապետի առաջին տեղակալ և արտգործնախարար, իշխան Կարել Շվարցենբերգն է (9.5%): Չորրորդ տեղում Չեխիայի սոցիալ-դեմոկրատական կուսակցության փոխնախագահ, սենատոր Յիրժի Դինստբիրն է (8%):
Հետազոտությունն անցկացվել է նոյեմբերի 17-ից դեկտեմբերի 16-ը: Հարցմանը մասնակցել է 18-ից բարձր տարիքի 1165 քաղաքացի:
Դեկտեմբերի կեսերին PPM Factum կենտրոնի հրապարակած տվյալներով՝ Զեմանը կարող է ակնկալել ընտրողների 25.6%-ի, Ֆիշերը 25%-ի , իսկ Դինստբիրը 10.6%-ի աջակցությունը:
Չեխիայի նոր նախագահը կընտրվի համաժողովրդական քվեարկությամբ: Համապատասխան սահմանդրական օրենքը ստորագրվել է փետրվարին: Նախկինում պետության ղեկավարը Չեխիայում ընտրվել է խորհրդարանի երկու պալատների ընդհանուր նիստում:
2013-ի մարտին լրանում է գործող նախագահ Վացլավ Կլաուսի պաշտոնավարման երկրորդ ժամկետը: Երրորդ ժամկետում առաջադրվելը սահմանադրությամբ արգելված է:
