Սոմալիի կառավարական ուժերը դեկտեմբերի 23-ին ազատել են տեղացի ծովահենների 22 պատանդի, որոնք առևանգվել էին 3 տարի առաջ: Այս մասին հայտնում է France-Presse-ը:
Պանամական «Այսբերգ 1» նավի անձնակազմն ազատ է արձակվել երկշաբաթյա օպերացիայի արդյունքում, որն անցկացրել են Սոմալիի ռազմածովային ուժերը: Օպերացիայի ընթացքում նավը, որը գտնվել է Մուդուգ տարածաշրջանի ափին, պաշարվել է զինվորականների կողմից: Ծովահենների ճակատագրի մասին ոչինչ հայտնի չէ:
Զինվորականներին հաջողվել է ազատ արձակել անձնակազմի 24 անդամներից 22-ին: Ազատ արձակվածների վրա հայտնաբերվել են կտտանքների հետքեր: Թե ի՞նչ է տեղի ունեցել մյուս երկուսի հետ՝ չի հաղորդվում:
Նավը, որը պատկանում է պանամական Iceberg International Ltd.ընկերությանը, Սոմալիի ծովահենների կողմից զավթվել էր 2010-ի մարտին Ադենի ծոցում՝ Եմենի Ադեն նավահանգստից 20 կմ հեռավորության վրա: Անձնակազմի անդամների թվում են եղել Հնդկաստանի, Պակիստանի, Ֆիլիպինների, Սուդանի և Եմենի քաղաքացիներ: