Սպիտակ տան պաշտոնական կայքի We the People նախագծի բաժնում միջնորդագիր է հրապարակվել՝ «Մագնիտսկու ցուցակում» ՌԴ նախագահ Վլադիմիր Պուտինին ներառելու պահանջով՝ այն դեպքում, եթե նա ստորագրի ամերիկացիների կողմից ռուս երեխաների որդեգրման արգելքի մասին օրինագիծը: Այս մասին տեղեկանում ենք whitehouse.gov կայքից:
Միջնորդագիրը ստեղծվել է դեկտեմբերի 23-ի երեկոյան և մի քանի ժամվա ընթացքում 150 ստորագրություն հավաքել: Ստորագրությունների թիվը շուտով կմոտենա 1800-ին: Միայն վերջին կես ժամում դրա տակ 250 մարդ է ստորագրել: Որպեսզի միջնորդագիրը հայտնվի Բարաք Օբամայի վարչակազմի դիտարկմանը, այն պետք է մեկ ամսում առնվազն 25 հազար ստորագրություն հավաքի:
Դեկտեմբերի 22-ին We the People-ում հրապարակվել էր միջնորդագիր, որն առաջարկում է «Մագնիտսկու ցուցակում» ներառել ՌԴ Պետդումայի պատգամավորներին, որոնք աջակցում են ամերիկացի ծնողների կողմից ռուս երեխաների որդեգրման արգելքի մասին օրինագծին: Միջնորդագիրն արդեն հավաքել է անհրաժեշտ 25 հազար ստորագրությունը:
Մեկնաբանելով նման առաջարկները՝ ՌԴ Պետդումայի միջազգային հարցերով հանձնաժողովի փոխնախագահ Վյաչեսլավ Նիկոնովը սպառնացել է համարժեք պատասխան տալ, եթե հայցը հավանության արժանանա Վաշինգտոնի կողմից:
Օրինագիծը, որն արգելում է ամերիկացիների կողմից ռուս երեխաների որդեգրումը, դիտվում է որպես պատասխան ԱՄՆ-ի ընդունած «Մագնիտսկու օրենքի»: Օրինագիծը Պետդումա է մտցվել դեկտեմբերի 10-ին: Փաստաթղթին հավանություն է տվել խորհրդարանի ստորին պալատը: Ինչպես սպասվում է՝ Դաշնային խորհուրդն այն կքննարկի դեկտեմբերի 26-ին, իսկ Վլադիմիր Պուտինը կարող է այն մինչև Նոր տարի ստորագրել:
Պուտինն անձամբ սատարում է օրինագծին: Այդ մասին նա հայտնել էր դեկտեմբերի 20-ին տեղի ունեցած մամլո ասուլիսի ժամանակ: