Սիրիայում այսօր կրկին հնչել են փողոց դուրս գալու կոչեր: Այդ երթերը կազմակերպվում են նախագահ Բաշար Ալ-Ասադի՝ այսօր ենթադրվելիք ելույթին ընդառաջ: Այս մասին հաղորդում է Haaretz թերթը: «Մենք ամենօրյա ցույցերի կոչ ենք անում և հավաքվելու վայրերը կհայտարարենք լրացուցիչ, քանի որ ոստիկանները անմիջապես դրանք կվերածեն ռազմական գոտու»,- ասված է The Syrian Revolution 2011 ֆեյսբուքյան խմբի հայտարարության մեջ:
Կիրակի օրը ներքին գործերի նախարարը կոչ էր արել սիրիացիներին չմասնակցել Դամասկոսի Օմայան մզկիթի մոտ կայանալիք բողոքի ակցիային: «Հաղորդագրությունները, որոնք դուք ստանում եք հեռախոսներով, այն մարդկանց ձեռքի գործն են, որոնք ցանկանում են անկարգություններ սադրել Սիրիայում»,- ասել է նա:
2000 թ. հոր մահից հետո Սիրիայի նախագահի պաշտոնը ստանձնած Բաշար Ալ-Ասադը վերջին օրերին երկրի ողջ տարածքում տեղի ունեցող բողոքի ակցիաներից հետո, երբ տարբեր հաշվարկներով զոհվել է 50-120 մարդ, հայտարարել է երկրում բարեփոխումներ իրականացնելու մասին: Ակնկալվում է, որ բարեփոխումների բովանդակության մասին նա այսօր կխոսի հատուկ հեռուստաուղերձում: