«Իջևանի ծխախոտի ֆերմենտացիոն գործարան» պետական փակ բաժնետիրական ընկերության լուծարումից հետո մնացած գույքն ուղղակի վաճառքով կսեփականաշնորհվի: Կառավարության առաջիկա նիստում նախատեսվում է ՀՀ ԿԱ պետական գույքի կառավարման վարչությանը հանձնված գույքը՝ Տավուշի մարզի Այգեհովիտ գյուղում 9 հզ. 611.2 քառ. մետր ընդհանուր մակերեսով շենքեր-շինությունները, վաճառել նախօրոք հայտնի գնորդ Լիլիթ Մարդանյանին: Գույքը գնահատվել է 5 մլն 238 հազ. դրամ: Գնորդին է նաև մասնավորեցվելու գույքի զբաղեցրած 2.07 հա հողատարածքը` իր կադաստրային արժեքով:
Կառավարության որոշման նախագծում նշվում է, որ գնորդը պարտավոր է 2 տարում կատարել 20.5 մլն դրամի ներդրում, ընդ որում` առաջին տարում` 8 մլն դրամ, 2-րդ տարում` 12.5 մլն դրամ, ներդրումների ավարտից հետո` 1 տարվա ընթացքում, առնվազն 6 ամիս ապահովել ամսական 16 աշխատատեղ՝ 80 հազ. դրամ միջին աշխատավարձով:
