Թուրքական Hürriyet թերթի փոխանցմամբ՝ ռուսական «Գազպրոմ» ընկերությունը Թուրքիայի ու Եվրոպայի համար հաջորդ տարվանից սկսած՝ նվազեցնում է գազի գինը: 2013 թ. սկսած` Թուրքիան և Եվրոպան 1000 խորանարդ մետր ռուսական գազի դիմաց վճարելու են ոչ թե 415 դոլար, այլ՝ 370 դոլար:
«Գազպրոմն» իր այս որոշումը պայմանավորել է շուկայում մրցունակ լինելու հանգամանքով: Օրինակ, եվրոպական երկրները և Թուրքիան 2012 թվականին «Գազպրոմից» գնել են 9.3 տոկոսով ավելի պակաս գազ: Ուշագրավ է, որ «Գազպրոմի» կողմից գազի գնի 10 տոկոս նվազեցման մասին հայտնի է դառնում դեկտեմբերի 21-ին Բրյուսելում կայանալիք ԵՄ-Ռուսաստան գագաթնաժողովից 48 ժամ առաջ:
Ռուսաստանը պլանավորել է հաջորդ տարի ավելացնել Թուրքիային ու Եվրոպային մատակարարվող իր գազի ծավալը՝ 140 միլիարդ խորանարդ մետրից այն հասցնելով 152 միլիարդ խորանարդ մետրի: Գազի արտահանումից «Գազպրոմի» ստացած եկամուտների 80 տոկոսը բաժին է ընկնում Եվրոպային:
