Ադրբեջանական APA լրատվական գործակալության փոխանցմամբ՝ Ադրբեջանում ԱՄՆ դեսպան Ռիչարդ Մորնինգսթարը լրագրողների հետ զրույցում անդրադարձել է Գաբալայի ռադիոտեղորոշիչ կայանի (ՌՏԿ) խնդրին, որի վարձակալության երկարաձգումից օրեր առաջ հրաժարվել էր Ռուսաստանը.
«Չեմ կարծում, թե ԱՄՆ-ը որևէ հետաքրքրություն է ցուցաբերում Գաբալայի ՌՏԿ-ի նկատմամբ: Ադրբեջանը՝ որպես Գաբալայի ՌՏԿ-ի սեփականատեր, ինքը պետք է որոշի դրա օգտագործման ձևը»:
Հիշեցնենք, որ ավելի վաղ ԱՄՆ-ը հրաժարվել է Գաբալայի ՌՏԿ-ն Ռուսաստանի հետ համատեղ շահագործելու հնարավորությունից: 2007 թվականի ամռանը Ռուսաստանի նախագահ Վլադիմիր Պուտինը Հայլիգենդամում տեղի ունեցած G-8-ի գագաթնաժողովում ԱՄՆ նախագահ Ջորջ Բուշ-կրտսերին առաջարկել էր համատեղ շահագործել Գաբալայի ՌՏԿ-ն, սակայն ԱՄՆ-ը հրաժարվել էր այդ առաջարկից:
Ի դեպ, ադրբեջանական կողմը Ռուսաստանին սպառնացել էր Գաբալայի ՌՏԿ-ից հրաժարվելու դեպքում կայանը հանձնել Թուրքիային կամ ԱՄՆ-ին:
