«Թույլ տվեք ինձ հիշեցնել հիմնական սկզբունքը: Յուրաքանչյուր ազգ ինքը պետք է որոշի` միավորվե՞լ այս կամ այն դաշինքի հետ, թե՞ ոչ, և ինչպե՞ս վերադասավորել իր անվտանգության համակարգը:
Ռուսաստանը ևս 1999թ. ստորագրել է ԵԱՀԿ խարտիայի այս հիմնական սկզբունքը: Ցանկացած ազգ ինքնուրույն է որոշում այս կամ այն դաշինքի հետ միավորվելու հարցը: Ռուսաստանը չպետք է որոշի`Վրաստանը տվյալ փուլում կարո՞ղ է միավորվել մեր դաշինքի հետ, թե՞ ոչ: Դա կորոշեն ՆԱՏՕ-ն և Վրաստանը»,- հայտարարել է ՆԱՏՕ-ի գլխավոր քարտուղար Անդրես Ֆոգ Ռասմուսենը, հաղորդում է Apsny-ն` վկայակոչելով Novaya Gazeta-ն Interfax-ը:
Գլխավոր քարտուղարի խոսքով` 2008թ. Բուխարեստում տեղի ունեցած ՆԱՏՕ-ի գագաթնաժողովի ընթացքում որոշվել է, որ անհրաժեշտ չափանիշների առկայության դեպքում Վրաստանը կդառնա ՆԱՏՕ-ի անդամ: «Դրանք դեռևս չկան: Մենք ՆԱՏՕ-Վրաստան հանձնաժողով ենք ստեղծել և աշխատում ենք Վրաստանի հետ բարեփոխումներ իրականացնելու համար: Հետագայում այն կարող է ունենալ ՆԱՏՕ-ին հատուկ չափանիշներ»,- նշել է Ռասմուսենը:
