ՄԱԿ-ում ԱՄՆ մշտական ներկայացուցիչ Սյուզան Ռայսը այլևս չի հավակնում պետքարտուղարի պաշտոնին Հիլարի Քլինթոնի հեռանալուց հետո: Ինչպես հայտնում է ITAR-TASS-ը, Ռայսն Օբամային համապատասխան նամակ է ուղարկել:
«Ես համոզված եմ, որ իմ թեկնածության հաստատումը կլինի շատ տևական, ապակառուցողական և ժամանակատար Ձեր և միջազգային ու ներքին դաշտում ԱՄՆ-ի առաջնահերթ խնդիրների համար»,- ասվում է Սպիտակ տան ղեկավարին ուղղված Ռայսի նամակում:
Սյուզան Ռայսը, որն ԱՄՆ-ն Միավորված ազգերի կազմակերպությունում ներկայացնում է 2009 թվականից, հանդիսանում է Օբամայի վաղեմի քաղաքական դաշնակիցն ու դիտարկվում էր որպես նոր պետքարտուղարի պաշտոնի հավանական թեկնածու: Սակայն ընդդիմադիր հանրապետականները Կոնգրեսում նրան դեմ էին հանդես գալիս՝ հայտարարելով, թե նրա հեղինակությանն անդառնալի վնաս է հասցվել ինչպես հայրենիքում, այնպես էլ արտերկրում: Պատճառը սեպտեմբերի 11-ին Լիբիայի Բենղազի քաղաքում ամերիկյան հյուպատոսության վրա հարձակման վերաբերյալ նրա արտահայտություններն էին:
Ռայսը հայտարարել էր, որ ողբերգությունը տեղի է ունեցել ինքնաբուխ, ֆիլմի դեմ ակցիան սկզբում խաղաղ բնույթ է կրել, և որ կատարվածն ահաբեկչություն չէ: Ավելի ուշ ազգային հետախուզության տնօրենի գրասենյակը հաղորդել էր, որ միջադեպը ծրագրված ահաբեկչություն էր:
